ENERGIA

Er Espitau Val d’Aran estree eth nau sistèma de cauhatge per biomassa

Es Servicis Assistenciaus Integradi d’Aran estreen dues caudères de biomassa que corbiràn es besonhs der Espitau Val d’Aran e part dera Residéncia Sant Antòni
Biomassa Espitau d'Aran
photo_camera Er Espitau Val d’Aran estree eth nau sistèma de cauhatge per biomassa /@conselharan

Es Servicis Assistenciaus Integradi deth Conselh Generau d’Aran an metut en marcha eth sistèma de cauhatge d’aigua per miei de dues caudères de 300KW que foncionen damb biomassa. Er equipament, qu’a auut un còst totau de cinc cents seishanta mil euros, finançats pera Deputacion de Lhèida, ja ei en foncionament.

Er equipament se trape en ua sala der Espitau de cinquanta ueit mètres carrats e un depòsit de quaranta mètres carrats, tara acumulacion de cent seishanta mètres cubics d’estèra, que corbiràn es besonhs de cauhatge der Espitau e ua part dera Residéncia Sant Antòni damb ua autonomia de foncionament de 15 dies. Era sala compde tanben damb un sistèma de pompatge e canalizacion que connècte damb eth sistèma centrau de distribucion, tant d’aigua cauda sanitària coma de cauhatge.

Biomassa Espitau d'Aran
Er Espitau Val d’Aran estree eth nau sistèma de cauhatge per biomassa /@conselharan

Entà Jordi Vilana, gerent d’Aran Salut: “ei un prumèr pas laguens dera economia circulara e dera sostenibilitat ecologica, mès tanben ua seguretat tar espitau, damb caudères naues e ara es principaus ena madeisha bastissa. Es caudères de gasòli demoren en dusau tèrme en cas que se’n calgue servir”.

Era sindica d’Aran, Maria Vergés, a soslinhat: “Aguesta caudèra, qu’a de supausar un estauvi iniciau d’uns seishanta a setanta mil euros annaus, ei era prumèra caudèra de biomassa de d’autes, projectades en municipis dera Val d’Aran restacades ath projècte de Gestion Forestau, qu’an de perméter mantier es nòsti bòsqui, ath delà de contribuir ara descarbonizacion deth nòste territòri e a fomentar era transicion energetica”.

Maria Vergés a hijut: “voi arregraïr eth trabalh des tecnics, autant d’Aran Salut coma deth Conselh Generau, entà arténher aguest objectiu finau”

Més a Val d'Aran