Un an mès, s’apròpe era celebracion dera naua edicion dera Marxa Beret, organizada peth Conselh Generau d’Aran e era estacion d’esquí Baqueira Beret, qu’aurà lòc era dimenjada deth 2 ath 4 de hereuèr de 2024.
Dejà son dubèrtes oficiaument es inscripcions a trauès dera plana web dera Marxa Beret e es interessats e interessades poiràn realizar-les enquiath 28 de gèr telematicament. Ath delà, eth 3 de hereuèr se poiràn realizar es inscripcions presenciaus en Centre Polivalent de Vielha.
Cau rebrembar qu’eth prètz dera inscripcion aumentarà segontes s’apròpe era data de realizacion der eveniment.
Era Marxa Beret ei ua des pròves d’esquí nordic mès assolidades que se realizen en territòri nacionau e que cada an compde damb ath torn de 1.000 participaires de tota Euròpa.
Aguesta hèsta der esquí de hons començarà eth dissabte 3 de hereuèr damb eth Campionat d’Espanha “Sprint” en Pla de Beret.
Eth dia 4 de hereuèr se realizarà era 44au edicion dera Marxa Beret enes distàncies de 42, 21 e 10 kilomètres.
Enguan, coma nauetat, era Marxa Beret compdarà damb ua naua pròva, nomentada “Mini Marxa Beret”, destinada as mès petits e petites e totes aqueres persones que se volguen iniciar ena practica d’aguest espòrt!
Es interessadi e interessades pòden trapar tota era informacion ena plana web oficiau dera corsa.
