28.01.2022 |
Viure als Pirineus

Baqueira Beret promò era iniciacion ar esquí pendent eth World Snow Day

Eth pròplèu 17 de gèr, en tot coïncidir damb eth Dia Mondiau dera Nhèu que se celèbre er es estacions d’esquí de tota era planeta, Baqueira Beret estree era sua promocion especiau entà debutants e acompanhaires qu’aurà ua durada de quate dimenjades de gèr e hereuèr (17-18, 24-25, 31-01 e 07-08)

Baqueira Beret
Baqueira Beret
Baqueira Beret promò era iniciacion ar esquí pendent eth World Snow Day

Se tracte d’ua jornada promoiguda pera Federacion Internacionau d’Esquí (FIS). Aguesta iniciatiua s’inicièc er an 2007 entà apropar era nhèu as mainatges e as familhes. Es objectius son transméter es beneficis dera practica des espòrts d’iuèrn, era importància de gaudir d’aguesti damb civisme e responsabilitat e eth besonh de conservar er entorn.

Prètzi especiaus entàs debutants e es sòns acompanhants

Es debutants estan d’enorabona donques qu’entà aguestes quate dimenjades Baqueira aufrís un paquet especiau d’esquí a un prètz fòrça accessible.

Includís es classes d’esquí aupin damb Era Escòla (es grops de 8-10 persones) entàs dus dies en airau de debutants de Beret entre era 11h00 a 13h00. Tanben includís eth loguèr de materiau es dus dies (esquís, bòtes e bastons). Mès ací non acabe era causa pr’amor que tanben s’includissen es minjars en pistes.

Eth prètz d’aguesta promocion ei de 76€ (includit er usatge des remontadors) per persona era dimenjada damb aguesti servicis. Tanben se premiarà as esquiadors abituaus que pòrten un amic debutant ara promocion donques qu’eth forfait jornalièr les demorarà per 23,50€ damb accès a tota era estacion. Eth punt d’amassada serà eth dissabte entre es 9h00 e es 10h00 deth maitin ena Tor de Contròl de Beret, a on s’arrecuelheràn es tiquets que permeteràn préner eth materiau e assistir ath curset.

Dimenjada de celebracion deth 50 anniversari de Baqueira Beret

Eth madeish dissabte 17, era estacion organize tanben un eveniment daurit entàs esquiadors e snowboarders de mès de 6 ans, serà era BBB50 Ski Race Experience entà celebrar es 50 ans dera estacion damb pròves d’aupin, boardercross e freeride tot combinat damb er art emergent des selfies enes punts mès nauti dera estacion.

Inscripcion dubèrta e gratuïta (assegurança obligatòria de 5€ ).

En acabar era jornada de nhèu, se poderà gaudir tanben dera baishada de halhes e deth castèth de huecs que debanarà entàs 18h45. A compdar des 19h00 començarà ua grana Hèsta 50 Anniversari Baqueira Beret ena galaria de Ruda.

Baqueira Beret promò era iniciacion ar esquí pendent eth World Snow Day
Comentarios