Era Entitat Municipau Descentralizada (EMD) de Bagergue a installat un desfibrillator extern automatic (DEA) en parcatge d’entrada deth pòble damb er objectiu de reforçar era seguretat deth pòble e garantir ua responsa rapida e eficienta en cas d’emergéncia cardiaca. Aguesta accion vò dotar eth pòble d’un recurs essenciau entà poder actuar rapidament en situacions critiques, especiaument en entorns de montanha a on es servicis d’emergéncia pòden tardar en arribar.
Aguest projècte s’encastre laguens deth Plan de Salut dera Deputacion de Lleida, qu’a permetut ara EMD de Bagergue accedir ath dispositiu, assegurar-ne eth manteniment periodic e organizar un cors gratuït de formacion sus era reanimacion cardiopulmonara (RCP) e er utís deth desfibrillator. Era formacion ei pensada entà dar coneishements basics e utils ara poblacion sus es prumèrs auxilis.
Era jornada formativa, dirigida per professionaus sanitaris, aurà lòc eth dijaus 29 de mai de 2025, de 10:00 a 14:00 ores, ena Sala de Hèstes de Bagergue (Camin Pessòla, 6). Era activitat ei gratuïta, mès calerà inscriuer-se prèviament a trauès deth següent formulari:
https://docs.google.com/forms/d/e/1FAIpQLSfMC3iv6ThE_qSipiXN6pWU8wQx QzYycMU32628jtoqQzz1Ow/viewform?usp=header
Er alcalde de Bagergue, Marc Tarrau, a destacat que “damb aguesta accion hèm un pas endauant entà hèr de Bagergue un lòc mès segur e premanit entà afrontar situacions d’emergéncia. Era formacion ei clau entà sauvar vides”. A higut tanben era importància dera implicacion ciutadana, remarcant qu’era salut publica ei ua responsabilitat compartida.
Damb era participacion activa des vesins e vesies, Bagergue se consolide coma espaci cardioprotegit, comprometut damb era salut e eth benèster collectiu. Aguesta accion represente un exemple de colaboracion entre administracion locau e supramunicipau, damb era guardad entà bastir ua societat mès informada, premanida e resilient.
