ESQUÍ DE FONS

Aguesta dimenjada arribe era 42au edicion dera Marxa Beret

Es inscripcions online son dejà barrades, mès encara te pòs inscríuer aguesta dimenjada de manèra presenciau en Centre Polivalent de Vielha
Marxa Beret
photo_camera Aguesta dimenjada arribe era 42au edicion dera Marxa Beret /CGA

Dempús d’auer estat ajornada en 2021 pr’amor dera pandèmia, aguesti 5 e 6 de hereuèr arribe era 42au edicion dera Marxa Beret, era pròva d’esquí nordic mès assolidada que se realize en territòri nacionau.

Eth dissabte 5 de hereuèr, entàs 10:00 ores, se celebrarà era pròva “Sprint Salomon”, qu’aguesta edicion serà tanben Campionat d’Espanha de Sprint.

Eth dimenge, dia 6 de hereuèr, se disputarà era 42au edicion dera Marxa Beret, damb un circuit popular de 10 km ena zòna de Beret e Orri; eth de 21 km ena zòna de Beret, Orri e Montgarri e fin finau eth circuit de 42 km ena zona de Beret, Orri, Montgarri e direccion Marimanha.

Marxa Beret 3(Foto: Aguesta dimenjada arribe era 42au edicion dera Marxa Beret / Anna Tur Blanch / RFEDI)

Eth recorrut definitiu poirie variar pendent aguesti darrèri dies se es tecnics der eveniment atau ac decidissen pr’amor des condicions.

Era Marxa Beret ei organizada peth Conselh Generau d’Aran, dera man de Baqueira Beret e eth Conselh Esportiu dera Val d’Aran. Compde damb era collaboracion dera Associacion Volentaris Val d’Aran, er Ajuntament de Vielha e Mijaran, Deputacion de Lhèida, Pompièrs d’Aran, Aran Salut, Mossos d’Esquadra, INS d’Aran, ath delà dera Reau Federacion Espanhòla Espòrts d’Iuèrn (RFEDI), era Federació Catalana d’Esports d’Hivern (FCEH) e es disparièrs patrocinadors.

Programa:

Diuendres, 4 de hereuèr

16:00 – Dubertura dera Sala d’Inscripccions (Conselh Generau d’Aran, Plaça d’Aran)

20:30 – Barrament dera Sala d’Inscripcions

Dissabte, 5 de hereuèr

09:00 – Dubertura dera Sala d’Inscripccions (Conselh Generau d’Aran, Plaça d’Aran)

10:00 – Campionat d’Espanha “Sprint Salomon” Plan de Beret

19:00 – Autreja de prèmis Campionat d’Espanha (Centre Polivalent de Vielha)

19:30 – Presentacion «42au Marxa Beret» (Centre Polivalent de Vielha)

21:00 – Barrament dera Sala d’Inscripcions (Conselh Generau d’Aran, Plaça d’Aran)

Dimenge, 6 de hereuèr

10:00 – Gessuda 42au Marxa Beret

13:30 –  Autreja de prèmis (Beret)

14:00 – Cerimònia de Clausura (Beret)

15:00 – Barrament deth circuit