27.10.2021 |
Viure als Pirineus

INSTITUCIONS

Aguest maitin a auut lòc era Comission Bilaterau entre eth govèrn catalan e eth Conselh Generau d’Aran

S’an actualizat partides pressupostàries qu’èren dejà comprometudes damb anterioritat en matèria de sanitat, gestion de fauna sauvatja e politica lingüistica
Bilateral Aran Generalitat octubre 2021
Comission Bilaterau entre eth govèrn catalan e eth Conselh Generau d’Aran / govern.cat
Aguest maitin a auut lòc era Comission Bilaterau entre eth govèrn catalan e eth Conselh Generau d’Aran

Aguest maitin a auut lòc, en Palai dera Generalitat de Catalunya, era amassada dera Comission Bilaterau entre eth govèrn catalan e eth Conselh Generau d’Aran, qu’a estat presidida pera sindica d’Aran, Maria Vergés, e era conselhèra de Presidéncia, Laura Vilagrà, ena qu’an participat tanben eth conselhèr de Territòri, Paisatge e Gestion ambientau, Francés Bruna, era conselhèra de Coneishement e Innovacion, Angelina Cases, eth conselhèr d’Espòrts e Governacion, Amador Marqués, e eth cap dera oposicion, Cesar Ruiz-Canela, atau coma d’auti nauti cargues dera Generalitat.

Pendent era amassada non s’a podut concretar eth compliment der acòrd de finançament entre Conselh e Generalitat per çò que hè ath pressupòst de 2021 que demore pendent e eth govèrn aranés a emplaçat ath govèrn catalan a solucionar aguest ahèr damb era major brevetat possible

“Pendent aguesta amassada auem reclamat que se complisque damb er acòrd de finançament deth Conselh Generau d’Aran, qu’auem demanat que sigue efectiu entath pròplèu 2022 ja qu’enguan, coma mos an comunicat, non serà possible actualizar-lo” afirmaue era sindica d’Aran, Maria Vergés, que higie que: “auem constituït tanben era Ponéncia de Traspassi e Convènis, un ahèr de vitau importància entath desplegament dera Lei de Regim Especiau d’Aran e des competéncies qu’encara non an estat assomides de forma efectiva peth Conselh, que son era majoria des que recuelh era Lei”.

Pla general de la Comissió Bilateral Generalitat-Conselh Generau d'Aran a la Sala Tàpies del Palau de la Generalitat. Imatge del 13 d'octubre del 2021 (Horitzontal)

Aguesta Ponéncia de Traspassi a fòrça ahèrs a abordar, coma ei eth cas dera lengua e cultura araneses, ua competéncia que non s’a actualizat der an 1992 ençà, mès tanben era atencion as persones, ahèrs sociaus e benèster, era gestion forestau o es espòrts, entre fòrça d’auti.

Aguesta Comission Bilaterau a barrat eth traspàs de foncions dera Generalitat de Catalunya ath Conselh Generau d’Aran en matèria de gestion de grani carnivors de fauna sauvatja

S’a tramitat tanben eth Decrèt de Traspàs de foncions dera Generalitat de Catalunya ath Conselh Generau d’Aran en matèria de gestion de grani carnivors de fauna sauvatja en Aran, ua competéncia que s’artenhec ena darrèra Comission Bilaterau (celebrada en gèr de 2020) e que permeterà ath govèrn d’Aran èster mès agil e eficient ara ora de solucionar es problematiques des ramadèrs derivades dera convivéncia damb er os.

Era sindica d’Aran a volut “arregraïr era volentat deth govèrn catalan entà desplegar era Lei d’Aran e tà encetar ua naua etapa ena relacion bilaterau entre eth Conselh Generau d’Aran e era Generalitat de Catalunya, basada en respècte e era leiautat institucionaus qu’andús govèrns meriten”.

Aguest maitin a auut lòc era Comission Bilaterau entre eth govèrn catalan e eth Conselh Generau d’Aran
Comentarios