Aguesta edicion se celebrarà en Vilac es dies 29, 30 e 31 d’agost, damb ua programacion plia de musica, dança, talhèrs, collòquis, gastronomia e activitats entà totes es edats. Enguan compde damb era collaboracion especiau der Ajuntament de Vilac e deth cicle Perifèria Cultural, qu’apòrten recorsi e complicitats entà contunhar de hèr créisher er hestivau.
Pòble Viu mantien es activitats qu’en conformen era esséncia: era Trobada de Musicians d’Arraïtz, eth Balh Trad Collaboratiu, era Trobada Transpirenenca de Projèctes Culturaus e eth Sopar Cantèra, que ei era grana cita gastronomica e festiva deth hestivau. Eth Sopar Cantèra, que se celebrarà eth divendres 29 tàs 20:00 ores, ei organizat pes volontaris e aufrís un menú complèt dinamizat per Raquel Cruces, Titouan Billon, Cocanha e d’auti convidats que haràn a cantar a toti es comensaus. Es entrades ja se pòden crompar en pobleviu.com.
Era musica en directe aurà moments destacadi damb eth concèrt de Cocanha (diuendres 29), que revisite era tradicion occitana damb energia e ritme; Bum Titis (dissabte 30), damb un directe potent que barrege bluegrass e old time e a un finau que promèt hèr a barar a toti damb un square dance sense fren; e eth Vermot Musicau damb Pantxix Bidart & Primaël (dissabte ath miei dia), un viatge sonor e poetic que hè dialogar era lengua basca e era occitana jos eth solei de Vilac.
Coma activitat especiau, enguan destaque era Moriscada deth dimenge 31 tàs 10:30 ores, ua amassada populara entà barar “Era Morisca de Vilac” dedicada a Lolita Beso e Cisco Sambeat, que vò esdevier un omenatge collectiu e emotiu.
Eth cartèl, era programacion e es inscripcions son disponibles en Instagram (@poble_viu) e en www.pobleviu.com. Pòble Viu ei possible gràcies ara implicacion de vesins, artistes e sustot volontaris, que cada an i meten eth sòn granet de sable.
