REMASSADA SELECTIVA

Es donades de reciclatge dera Val d’Aran aumenten enquiath 25,2% pendent 2020

Pendent es darrèri 5 ans s’a aumentat eth percentatge dera remassada selectiva deth 19,51% ath 25’2%
Reciclatge Aran 3
photo_camera A era Val d'Aran s’a aumentat eth percentatge dera remassada selectiva/CGA

Per prumèr còp des que se comptabilizen es donades de reciclatge en territòri, era Val d’Aran artenhec en an 2020 superar eth 25% de remassada selectiva, totun aguest creishement represente sonque un aument deth 0,58% respècte de 2019 (24,64%).

Eth conselhèr de Territòri, Paisatge e Gestion Ambientau, Oriol Sala, explicaue que: “en 2020, pr’amor dera pandemia provocada pera COVID-19, s’a generat lèu un 10% mens de tones de residus, e des 6.322.000 tones generades, se n’a reciclat eth 25’22%” e higie que: “ei d’arregrair er esfòrç qu’amien a tèrme es persones e establiments cada còp mès comprometudi damb eth miei ambient, mès mos trapam fòrça luenh der objectiu mercat pera Comission Europèa entà 2025, data tara quau auríem de reciclar eth 55% des nòsti residus”.

Reciclatge Aran 2

Enes darrèri 5 ans era Val d’Aran a anat aumentant progressivament eth volum de remassada selectiva, en tot passar de reciclar eth 19,51% des residus generadi en 2015 enquiath 25,2% en 2020. D’aguest percentatge de remassada selectiva, çò que mès se recicle ei eth veire, que supause un 9,18%, seguit peth papèr e eth carton, que supausen eth 8,57% des residus recicladi.

S’a amiat a tèrme un aument deth reciclatge d’envasi respècte der an anterior, en tot passar d’un 2,97% a un 4,19%. Era organica, pera sua part, supause sonque un 3,28% dera selectiva remassada.

“Des deth govèrn deth Conselh Generau dejà trabalham en possibles campanhes de conscienciacion entà incentivar er aument des donades dera remassada selectiva”, asseguraue Sala.

Reciclatge Aran

Més a Val d'Aran