ARTS PLÀSTIQUES

Er Ajuntament de Naut Aran impulse eth 20 prèmi de pentura Naut Aran-Baqueira

Er objectiu d'aguest concors ei eth de dar a conéisher a nivèu internacionau eth municipi de Naut Aran pr’amor qu'ei daurit entà que participe quinsevolh persona deth país que sigue.
Naut Aran concurs pintura
photo_camera Imatges d'archiu dera 1ª edicion deth prèmi de pentura Naut Aran-Baqueira / nautaran.org

Dempús deth succès dera anteriora edicion a on i auec mès de 800 inscrits de tot eth mon, er Ajuntament de Naut Aran a decidit hèr era dusau edicion deth prèmi de pentura Naut Aran-Baqueira. Aguest eveniment auec ua grana repercussion internacionau, en tot aparéisher enes mejans nacionaus deth grop Mediaset en sòn portau web damb un gran impacte entre toti es usatgèrs dera pagina.

Er Ajuntament de Naut Aran creèc era prumèra edicion deth prèmi internacionau de pentura Naut Aran Baqueira damb eth prètzhèt de hèr a conéisher eth municipi e que podessen arribar òbres artistiques d'un nivèu excellent e excepcionau. Damb aguesta intencion artenhuda ena anteriora edicion, ara se cerque projectar encara mès eth municipi de Naut Aran en tot aufrir prèmis tanben entàs menors d'edat.

Naut Aran concurs pintura 2
Imatges d'archiu dera 1ª edicion deth prèmi de pentura Naut Aran-Baqueira / nautaran.org

En aguest sens, se mantieràn es dotacions economiques entath prumèr e dusau classificat que seràn de 6.000 e 3.000 èuros respectivaments mès, coma nauetat, es menors de 18 ans auràn tanben dus prèmis que seràn de 500 èuros entath prumèr classificat e 300 èuros entath dusau classificat.

Era tematica sus era quau es artistes auràn de realizar es sòns diboishi enguan serà restacada damb era nhèu, tostemp que se certifique qu'era òbra enviada mòstre bèth aspècte de Naut Aran coma per exemple bèra ua des sues glèises, montanhes, carrèrs o païsatges en generau. Es òbres auràn de presentar-se en format JPG, damb ua bona resolucion, a trauès dera pagina web www.mundoarti.com. Eth termini de presentacion anarà deth 1 de hereuèr enquiath 17 de mai de 2023 tàs 23:59 ores.

Naut Aran concurs pintura 3
Imatges d'archiu dera 1ª edicion deth prèmi de pentura Naut Aran-Baqueira / nautaran.org

Eth baile de Naut Aran, César Ruiz-Canela, destaque que “ei ua grana oportunitat entà nosati poder promòir eth nòste municipi d'ua forma tan peculiara pr’amor que seguraments fòrça gent mos poderà conéisher. Gràcies ad açò, mos arribaràn òbres de grana qualitat e que mos permeteràn gaudir, mès se cap, des nòsti pròpris entorns”.

Er objectiu d'aguest concors ei eth de dar a conéisher a nivèu internacionau eth municipi de Naut Aran pr’amor qu'ei daurit entà que participe quinsevolh persona deth país que sigue. Eth jurat serà representat per expèrts ena matèria e era sua decision serà inapellabla. S’harà ua seleccion des 50 milhors òbres, coma est an passat, que seràn expausades entara sua venta ath public e coma mòstra pictòrica s'atau ac desiren es pròpris artistes.