Aué 17 de junh se celèbre era Hèsta d’Aran, que commemòre era restitucion deth Conselh Generau d’Aran e era recuperacion des sòns drets e privilègis, hè 30 ans. Enguan damb motiu dera Hèsta d'ArAN eth govèrn deth Conselh Generau Aran vò arregraïr a tota era ciutadania aranesa auer demostrat, mès que jamès, èster er Aran Solidari deth que toti e totes èm orgulhosi.
Eth sindic d’Aran Paco Boya a manifestat "Totun, çò qu’ei mès important e voleria deishar coma messatge en aguest 17 de junh ei que viuem en un gran país, e un país ja sabetz que non le hèn gran es KM carrats, n’es nautades des sues montanhes, tanpòc es sòns monuments. Un país le hè gran era sua gent, es persones com aqueres as qu’aué omenatjam, l’hè gran era actitud solidària des sòns poblants, era capacitat de toti e cada un de pensar en plurau, en “nosati e nosates”, d’èster ua societat que sap e vò compartir es valors dera solidaritat e der umanisme. Ua societat que se preocupe de cada ua des persones que compartissen aquera polida paraula deth vesiatge. Per aquerò, aué era nòsta hèsta ei mès que jamès era hèsta deth gràcies, era hèsta d’aqueres persones qu’auetz complit damb dignitat e solidaritat eth vòste trebalh, auetz dat mòstra dera vòsta responsabilitat e empatia e auetz hèt un exercici d’entrèga e de compromís damb era gent d’Aran. Visca Aran".
