Un an mès, s’apròpe era celebracion d’ua naua edicion dera Marxa Beret, organizada peth Conselh Generau d’Aran e era estacion d’esquí de Baqueira Beret, qu’aurà lòc era dimenjada deth 31 de gèr e 1 de hereuèr de 2026.
Ja son dubèrtes oficiaument es inscripcions a trauès dera plana web dera Marxa Beret e es interessats e interessades les poiràn hèr enquiath ¿25 de gèr, telematicament. Eth 31 de gèr tanben se poiràn hèr es inscripcions presenciaus en Centre Polivalent de Vielha. Cau rebrembar qu’eth prètz dera inscripcion aumentarà a mesura que s’apròpe era data der eveniment.
Era Marxa Beret ei ua des pròves d’esquí nordic mès assolidades que se hèn en Estat espanhòu e cada an compde damb uns 1.000 participants de tota Euròpa. Aguesta hèsta der esquí de hons començarà eth dissabte 31 de gèr, damb era competicion deth Campionat d’Espanha “Esprint” en Plan de Beret.
Eth dia 1 de hereuèr se correrà era 46au edicion dera Marxa Beret enes distàncies de 42, 21 e 10 quilomètres. Enguan, per dusau an consecutiu, era Marxa Beret compdarà damb era pròva dera “Mini Marxa Beret”, entàs mès petits e petites e tanben tà totes aqueres persones que se volguen iniciar ena practica d’aguest espòrt, damb un recorrut de 5 quilomètres e un prètz redusit.
