Vielha e Mijaran destaque per èster un municipi que se preocupe peth medi ambient e peth sòn entorn naturau. En aguest sens, des der Ajuntament de Vielha e Mijaran s’a organizat ua jornada de neteja des arrius Garona e Nere, en tot arremassar es lordères que s’i trapen en aguesti endrets.
Era jornada aurà lòc eth pròplèu 16 d’abriu, e tota era gent volentària que volgue participar d’aguesta accion de suenh d’aguesti espacis naturaus, ac pòden hèr en tot presentar-se entàs 10 ores en parcatge des antigues casèrnes militares.
Aguesta accion compde damb era collaboracion d’Ecoembes, es Volentaris d’Aran e Paradores de Turismo de España.
“Vielha e Mijaran destaque per èster un municipi que se preocupe per suenhar es sòns espacis naturaus, que son un des principaus atractius toristics qu’auem, e des der Ajuntament credem qu’auem de mantier aguest esperit, e per aquerò organizam aguesta jornada de neteja des arrius Garona e Nere”, comente eth baile de Vielha e Mijaran, Juan Antonio Serrano. E ahig que “aguest graet de sable qu’aportam en Vielha e Mijaran ei un exemple de compromís damb eth medi ambient entà que pogam mantier eth territòri enes milhores condicions possibles entàs futures generacions”.
