Eth grop d’Unitat d’Aran a demanat ar Ajuntament de Bossòst sus eth futur dera bastissa der antic cinèma, ara que ja ei propietat municipau, dempús des negociacions entath sòn aqueriment qu’amièc a tèrme er anterior equip de govèrn entestat per alcalde Amador Marqués. En aguest sens, UA a mostrat era sua preocupacion dauant der estat de deteriorament der equipament municipau, plaçat ath costat deth recinte escolar, e a demanat ar Ajuntament qu’amie a tèrme es trabalhs oportuns entà assegurar-ne eth sòn estat balhat qu’eth mantenement des equipaments municipaus ei ua obligacion deth consistòri.
Eth grop d’UA a aufrit era sua collaboracion entà hèr possibla era reabilitacion der antic centre culturau de Bossòst, damb era ajuda de d’autes administracions publiques, coma eth Conselh Generau d’Aran. “Entad açò, cau qu’er Ajuntament inicie es prumèri passi entà mantier es trobades de besonh e definir eth projècte de futur entà un centre qu’entenem ei clau entara prosperitat economica e culturau de Bossòst”, segontes a manifestat eth còsso Marqués.
