Eth grop d’Unitat d’Aran ena Deputacion de Lleida a presentat ua mocion entà demanar ara Generalitat era melhora dera C-28 en tram comprenut entre Vielha e Baquèira, e enes trams que manquen entre eth Pòrt dera Bonaigua e Esterri d’Àneu, e aplicar es mesures de besonh entà garantir ua mobilitat segura, fluïda e sostenibla. En aguest sens, UA reclame era dotacion d’un plan especific d’infraestructures e mobilitat entàs territòris deth Pirenèu afectadi pes accèssi entàs estacions d’esquí, que compde damb es institucions deth territòri, coma eth Conselh Generau d’Aran.
Era carretèra C-28 constitusís un des èishi vertebradors der hilat de carretères deth Pirenèu, e en concrèt, un accès vitau entara societat e era economia dera Val d’Aran e eth Pallars Sobirà. Totun, “enes darrèri ans, aguesta via a estat objècte de diuèrses melhores, en tram deth Pòrt dera Bonaigua, mès non atau en tram de Vielha – Baquèira”, segontes era mocion.
UA enten qu’aguest tram da accès a un des punts mès dinamics deth Pirenèu, sustot en iuèrn, pr’amor qu’ei era unica via d’accès entara estacion d’esquí de Baqueira Beret, deth sòn principau nuclèu urban e des vilatges comprenudi entre es municipis de Naut Aran e Vielha Mijaran, que patissen fòrça viatges situacions de collapse persistent de transit en diuèrsi dies e ores punta pendent era sason d’esquí.
“Aguest hèt indique qu’era evolucion dera destinacion toristica, referenta en encastre des espòrts de nhèu, non a anat acompanhada dera melhora de besonh en encastre des infraestructures e era mobilitat publiques que vertèbren eth territòri e dan servici as sòns usatgèrs”, indique eth tèxte presentat.
