Eth passat dimèrcles, 15 de noveme, retornèren es campanes Santa Maria e Santa Barbara de Vilamòs, dempús qu’eth Conselh Generau d’Aran les portèsse a restaurar eth passat mes de junhsèga.
Era actuacion, impulsada peth Conselh Generau d’Aran e amiada a tèrme damb era collaboracion dera Deputacion de Lleida, a auut un còst de 17.304,21€ e a consistit ena restauracion des campanes, eth bastiment de naues joates e batalhs e un nau sistèma entà ancorar andues campanes as hièstraus enes talhèrs d’ua empresa especializada, ua intervencion fòrça de besonh entath mantenement e suenh patrimoniau d’aguest campanau.
Era campana grana, qu’a eth nòm de Santa Maria e ues dimensions d’1,05 m de diamètre maxim, ath torn d’1 mètre de nautada, e un pes d’apròp de 600 kg, siguec fabricada en 1886 per un honedor de nòm Ballesteros, autor de d’autes campanes ena Val d’Aran. Ja hè fòrça temps qu’auie era joata e eth batalh en fòrça mau estat e, per aguesta rason, se trapaue immobilizada.
Era auta campana, dedicada a Santa Barbara, damb 0,81 m de diamètre ena boca, 0,86 m de nautada e un pes aproximatiu de 350-400 kg, date de 1841 e siguec òbra d’Ignasi Jaqueti. Era campana tanben auie de besonh un renauiment e er assolidament dera joata e eth batalh.
