Er Ajuntament de Naut Aran promò un plan estrategic entà enterpreses e autonòms deth municipi damb er objectiu de poder digitalizar e adaptar es naues tecnologies as negòcis qu'atau ac desiren de forma totauments gratuïta. D'aguesta manèra, se cerque èster mès competitius coma destinacion toristica gràcies a formar part d'un gran hilat d'economia digitau.
Entre d'auti ahèrs, s'aufrirà des dera creacion d'ua pagina web, gestion de hilats sociaus, posicionament SEO o gestion de clients enquia esturments tan practics aué dia coma ei eth comèrç electronic o d'autes formes de benefici on-line. Ath delà, s'aufrís era possibilitat, tanben gratuïta entàs enterpreses, de poder formar as pròpris trabalhadors en diuèrsi encastres restacadi damb era tecnologia e damb eth prètzhèt de generar un benefici e milhorar era qualitat deth servici aufertat.
Aguest programa promoigut per ajuntament ei totauments gratuït e aurà ua vigéncia d'un an qu'er empresari o autonòm non s'aurà d'implicar economicament e se gestionarà a trauès deth burèu d'innovacion, formacion e tecnologia qu'a creat recentaments eth consistòri.
Eth baile de Naut Aran, César Ruiz-Canela, destaque que "auem coma mission principau damb aguesta accion crear un hilat d'economia digitau entà transformar toti es negòcis e entà formar ath major nombre de persones en mon digitau".
Pendent es pròplèu setmanes, un agent d'aguest departament passarà pes diferentes enterpreses e contactarà damb es autonòms deth municipi entà presentar-lis era prepausa e qu'atau poguen potenciar era sua enterpresa ath maximom e plaçar-se en entorn digitau e accedir a un gran nombre de naui perfils d'interès entath sòn comèrç.
