05:37h. Dissabte, 24 Juny de 2017

Jornada de formacion en seguretat damb elicoptèr des agents de Miei Ambient deth Conselh Generau d’Aran

Era formacion s'a desvolopat ena Bòrda dera Lan de Bagergue, a on s'an amiat a tèrme es practiques damb er elicoptèr parat e en movement.

Jornada de formacion sus seguretat.
Jornada de formacion sus seguretat.

Es agents de Miei Ambient deth departament d'Agricultura, Ramaderia e Miei Naturau deth Conselh Generau d’Aran, an participat aué en ua jornada de formacion sus seguretat en entorn d'elicoptèr impartit per tres especialistes deth còs des agents ruraus dera Generalitat de Catalonha.

Era formacion s'a desvolopat ena Bòrda dera Lan de Bagergue, a on s'an amiat a tèrme es practiques damb er elicoptèr parat e en movement.

Aguestes practiques formatives s'includissen laguens eth convèni de collaboracion que mantien eth Conselh Generau d’Aran e eth departament d'Agricultura, Ramaderia, Pesca e Alimentacion dera Generalitat, tant es agents de Miei ambient coma es Agents Ruraus, son obligadi a obtier determinadi coneishements de formacion contínua en çò que tanh ara prevencion e a minimizar eth risc enes sues intervencions, donques a compdar d’ara, era formacion en seguretat en entorn d'elicoptèr serà obligatòria entà participar enes servicis d'aguesti agents que se requerisque er emplec d'aguest transpòrt aerian.

Cap destacar qu'en cas dera Val d’Aran, a causa dera sua orografia, en fòrça casi de seguiment de fauna o d'accions contra furtius, ei de besonh qu'es agents de Miei ambient compden damb eth supòrt der elicoptèr.