Aguest maitin, pendent era session ordinària deth Plen deth Conselh Generau d’Aran, s’a aprobat, damb es vòts a favor d’Unitat d’Aran e es vòts en contra de Convergéncia Aranesa, era declaracion institucionau presentada peth govèrn d’Aran entà instar ath govèrn der Estat a revisar eth marc de reconeishement dera tipologia de “municipis tensionadi” en matèria d’abitatge.
“Er accès a ua viuenda digna e assequibla ei ua qüestion que reclame accions urgentes en nòste territòri deuant dera dramatica situacion que viuem. Eth govèrn d’Aran ei comprometut a hèr tot çò que sigue ena nòsta man entà aufrir alternatives que mos permeten melhorar era grèu situacion actuau” asseguraue era sindica d’Aran, Maria Vergés.
Eth prètz deth loguèr en nòste territòri s’a doblat en sonque un an en tot plaçar-se enes 788,64€ de mieja segontes es donades der Incasòl deth passat mes de deseme, çò que supause un increment deth 34,4% respècte deth trimesadèr anterior. Era situacion dera manca de viuenda publica e era existéncia d’un mercat desregulat operat de diuèrsi endrets ençà conformen un entorn d’especulacion que dificulte aguest accès ar abitatge.
En aguest sens, era sindica d’Aran manifestaue que: “damb er objectiu de contribuïr ara resolucion d’aguesta grèu problematica, eth Conselh Generau d’Aran trabalhe de ja hè un temps en Plan d’Abitatge d’Aran e a sollicitat tanben ara Generalitat de Catalunya eth traspàs der encastre competenciau qu’en matèria d’abitatge li reconeish era Lei de Regim Especiau”. E higie que “ua des prumères donades qu’aguest estudi mos a balhat ei que sonque un 38% der abitatge existent en Aran se destine a viuenda oficiau, çò que demòstre eth besonh de, entre d’autes qüestions, declarar-mos coma airau tensionat”.
Ena declaracion institucionau aprobada aué, elaborada peth govèrn aranés, se senhale que: “un des grani trebucs entà qu’es diuèrses administracions competentes poguen impulsar actuacions de melhora en aguesta qüestion ei er hèt qu’es critèris qu’emplegue er Estat entà qualificar coma “municipis tensionadi” non incorpòren ad aqueri territòris que, pr’amor de motius de caractèr toristic, an limitat er accès ara viuenda a collectius vulnerables, e especiauments ara joenessa e trabalhadors, coma ei eth cas dera Val d’Aran”, e per aguest motiu se sollicite qu’er estat revise eth marc de reconeishement dera tipologia de “municipis tensionadi” entà que i demoren includidi aqueri que pr’amor deth sòn caractèr toristic an limitat er accès ara viuenda a collectius vulnerables.
Entara sindica d’Aran “resulte inconcebible qu’eth partit dera oposicion vòte en còntra d’ua demana coma aguesta demostrant ua manca de responsabilitat deuant des besonhs dera ciutadania”.
Aguesta declaracion se harà arribar ath govèrn der Estat, ara Generalitat de Catalunya e as ajuntaments dera Val d’Aran.
