Eth departament de Torisme deth Conselh Generau d’Aran inície aué era sua campanha de sensibilizacion “Camins compartits”, entà conscienciar sus era conviuença deth ciclisme, en totes es sues modalitats, eth senderisme e d’autes activitats damb diuèrsi publics enes nòstes montanhes e camins.
“Deth govèrn d’Aran estant volem qu’es nòstes montanhes siguen un espaci segur e amable entà toti es publics, a on es diferentes activitats que se pòden realizar conviuen e i age respècte” asseguraue eth vicesindic e conselhèr de Governacion, Innovacion, Economia e Torisme, Amador Marqués, en tot híger que: “per aguest motiu, ère entà nosati primordiau qu’eth Plan de Sostenibilitat Toristica dera Val d’Aran contemplèsse aguesta campanha de sensibilizacion, que mos a d’ajudar a crear consciéncia enes camins compartits”.
Era campanha, que s’inície aué damb era gessuda deth prumèr video de “Camins Compartits” a on un guida de bicicleta de montanha compartís era sua experiéncia e inste as usatgèrs e usatgères que practiquen aguesta modalitat a redusir era velocitat en toti aqueri camins a on i a preséncia abituau de senderistes.
Atau madeish, mès enlà des diuèrsi videos que s’anaràn compartint enes hilats sociaus, s’amiarà a tèrme ua senhalizacion des camins en tot demanar respècte e conviuença entre es diferentes activitats, s’abilitarà ena plana web www.visitvaldaran.com un apartat a on balhar tota era informacion sus aguest ahèr e s’amiaràn a tèrme, de manèra presenciau e telematica, enquèstes entà conéisher es perfils des usatgèrs e estudiar quines autes accions se poderien realizar.
