Eth Conselh Generau d’Aran a adjudicat dejà es òbres entara melhora e adequacion deth Refugi de Saboredo.
En concrèt, damb aguestes òbres se vò solucionar era problematica damb eth banh, qu’actuaument ei en exterior e se trape a ua distància d’uns 22 mètres, circonstància que provòque molèsties enes persones usatgères, especiaument pendent era sason d’iuèrn. Entà poder dar solucion ad aguest problèma, se vò installar un banh sec adossat ena bastissa deth refugi.
Atau madeish, s’amiaràn a tèrme un seguit d’actuacions entà revertir eth deteriorament d’aguest equipament en punts coma era codina e era installacion electrica e d’aigua, e se melhorarà era seguretat dera bastissa.
“Eth de Saboredo ei un refugi que pòrte dejà molti ans en servici e qu’auie de besonh ua actualizacion entà poder aufrir un melhor servici as visitants qu’acuelh ath long der an”, asseguraue era sindica d’Aran, Maria Vergés.
En totau, eth govèrn d’Aran invertirà ath torn de 150.000 € en aguesti trabalhs, entà poder actualizar eth Refugi de Saboredo. Era actuacion compde damb ua ajude LEADER per valor de 89.399€.
