Eth plen der Ajuntament de Vielha e Mijaran ven d’aprovar aguest dimèrcles, en session ordinària, eth pressupòst municipau de 2024, avalorat en 8.133.830,51€. Aguesta chifra supause era mès nauta dera administracion ena sua istòria. Er aument des compdes de 2024 en relacion as de 2023 se place en un 17,39%, damb 1.205.043.87€ mès.
Un des principaus airaus a on se reflèxe aguesta pujada ei en des despenes correntes. En aguest sens, s’amie a tèrme un increment dera despena de personau administratiu e tecnic deth 14,36%, damb era creacion de naues places.
D’aute biais, en pressupòst de 2024 se produsís un aument tanplan important dera aportacion economica qu’er Ajuntament de Vielha e Mijaran destine as Entitats Municipaus Descentralizades. Cau remercar que se genère un aument deth 98,71%, en tot passar de 116.326,40€ de 2023 as 231.157,27€ que i aurà en 2024.
Eth pressupòst s’a aprovat damb es vòts a favor deth govèrn municipau d’Unitat d’Aran, e a compdat damb era abstencion de Convergéncia Aranesa e eth vòt en contra d’Aran-Amassa.
“Eth pressupòst der Ajuntament de Vielha e Mijaran de 2024 ei eth mès naut dera sua istòria e, en aguest sens, sò fòrça erós de poder arténher aguesta hita, en tot assolidar un pressupòst basat ena eficiéncia e era eficàcia dera gestion municipau. Aguesta bona situacion des compdes mos permeterà desvolopar desparières inversions importantes en municipi” comente eth baile de Vielha e Mijaran, Juan Antonio Serrano. E ahig que “er objectiu ei qu’aguest ajuntament sigue ua administracion ben gestionada e solventa, e que se regís per equilibri pressupostari”.
