08:36h. Dimecres, 22 Novembre de 2017

Melhora deth Camin naturau de Soberado ath guardader dera aigua

Damb era melhora deth Camin de Soberado, es visitants dera ribèra dera Artiga de Lin, pòden gaudir de tota era beresa d'aguest lòc e escuélher de quina manèra vòlen efectuar era visita

Camin de Soberado. Foto: Conselh Generau
Camin de Soberado. Foto: Conselh Generau

Eth Conselh Generau d’Aran a trauès dera enterpresa S.A.V.A. a amiat a tèrme aguest ostiu era recuperacion deth tram entre eth Camin de Soberado e eth guardader dera aigua.

Er emplaçament dera zòna a on s'a efectuat era accion, ei rota entre Vielha e eth Pòrt dera Picada en tot passar peth Refugi dera Artiga de Lin. Se tracte der antic camin d'accès entara Artiga de Lin qu’acumulaue grana quantitat de vegetacion qu'ac tapaue, pèires queigudes des murs e erosionat pera aigua.

S'a bastit un accès ath camin des deth Parcatge dera Artiga de Lin, quate passarèles entà crotzar es barrancs d’Aubert e de Bernatet e dera hònt existenta, ath delà de reperfilar eth camin en tot desbrossar era zòna, e deth bastiment de parabandes de seguretat ath long de tot eth camin e en guardader dera aigua.

Damb aguesta accion que s'includís laguens des trabalhs realizadi enes darrèri mesi per part deth Conselh Generau d’Aran entara melhora der accès ara ribèra dera Artiga de Lin, e que tanben includís eth tren dera Artiga, es visitants pòden accedir en tot caminar des deth madeish parcatge ath costat dera ermita enquias Uelhs deth Joeu e arribar enquiath madeish Pla dera Artiga.

Eth Govèrn d’Aran a destinat ad aguesta accion un pressupòst de 17.896,20 € provenenti deth convèni de collaboracion entre eth Conselh Generau d’Aran e era Fundación Endesa entara recuperacion de camins ena Val d’Aran maumetudi pes aiguats der an 2013.

Damb era melhora deth Camin de Soberado ath guardader dera aigua, es visitants dera ribèra dera Artiga de Lin, pòden gaudir de tota era beresa d'aguest lòc e escuélher de quina manèra vòlen efectuar era visita, pr’amor que pòden accedir damb eth tren dera Artiga ara ora de pujar enquiath pla e baishar en tot caminar per aguest nau camin, o hè'c ara invèrsa.