MasterChef enregistre ua pròva d’exteriors dera naua sason ena Val d’Aran
Eth talent show gastronomic, produsit per RTVE en collaboracion damb Shine Iberia, s’a traslladat tara estacion d’esquí dera Val d’Aran, Baqueira Beret, a on es aspirants acompanhadi pes chefs conductors deth programa: Pepe Rodríguez, Samantha Vallejo-Nagera e Jordi Cruz an codinat en un entorn iuernau.
Entre es comensals qu’an pogut degustar es menus elaboradi pes aspirants èren: era sindica d’Aran, Maria Vergés; es conselhèrs d’Economia, Torisme e Promocion Economica d’Aran, Juan A. Serrano e Josep Canut; era conselhèra de Naues Tecnologies e Innovacion, Angela Cases; eth director comerciau de Baqueira Beret, Xavi Ubeira; eth president deth Grèmi d’Ostalaria dera Val d’Aran, Xacobe Bartolomé, ath delà des alumnes e professors dera Escòla d’Ostalaria dera Val d’Aran.
Eth conselhèr d’Economia, Torisme e Promocion Economica d’Aran, Josep Canut, a manifestat: “Qu’era Val d’Aran age pogut acuélher un programa de tant exit coma MasterChef ei ua grana promocion a nivèu nacionau e internacionau qu’animarà a fòrça gent a visitar-mos”.