Eth govèrn d’Aran presente era IIau edicion der Hestau Culturau “TerSon, eth son dera tèrra”

Era sindica d’Aran Maria Vergés, a presentat eth cartèl oficiau dera IIau edicion“TerSon, eth sòn dera tèrra”, que forme part deth programa dera Hèsta d’Aran d’enguan, der 11 ath 17 de junh en reconeishença ara cultura, era lengua e era musica pròpria dera Val d’Aran e qu’a coma objectiu dignificar e apropar ara ciutadania aguesta data tant importanta entath nòste territòri.

A trauès d’un ample calandari d’activitats culturaus, musicaus e institucionaus, eth TerSon d’enguan vò mostrar, un viatge mès era vitalitat dera societat aranesa e rebrembar era importància deth dia 17 de junh. Atau madeish, se preven activitats e actuacions entà tot tipe de public, entà apropar-les era activitat e actuacions culturaus ara societat aranesa.

Eth programa includís es següentes activitats destacades:

• Cantata des Escòles d’Aran e “La CliKa” en aranés, concèrts damb grops coma Sarabat, Rambalhe Arredalh, atau coma eth Tribut a Pau Donés a cargue de Jarabe de Palo, qu’animaràn es serades ena Plaça d’Aran e en Parcatge des Militars de Vielha.
• GustAran, eveniment gastronomic a cargue de diuèrsi restaurants dera Val d’Aran, eth dissabte 14 de junh, includit laguens des actes dera Region Mondiau dera Gastronomia qu’organize era Generalitat de Catalonha
• Actes institucionaus deth 17 de junh, damb recepcion oficiau ena sedença deth Conselh Generau d’Aran, desfilada des pendonse autrejament deth Prèmi 17 de Junh. Enguan coma nauetat se descorbiràn, ena madeisha sedença deth Conselh, es retrats des sindics e sindiques d’Aran atau coma un quadre damb eth listat istoric des persones qu’an aucupat aguest cargue enes darrèri sègles.
• Activitats entà tota era familha, coma es espectacles infantils e es tradicionaus dances araneses.
• Nau concors Aranvision, finau en dirècte deth prumèr certamen de cançons en aranés.

Era sindica d’Aran, en tot presentar eth programa, a destacat que “ TerSon vò èster un Hestau tara gent d’Aran, que permete apropar era cultura e era musica ara nòsta ciutadania, ath temps que poténcie era creacion culturau pròpria, hèta tanben en aranés, en tot ajudar atau a impulsar e dignificar era Hèsta Nacionau d’Aran entà hèr-la de toti es aranesi e araneses”

Entara organizacion d’aguest Hestau, eth Conselh Generau d’Aran a compdat entad aguesta naua edicion damb era collaboracion dera Generailtat de Catalunya, er ajuntament de Vielha-Mijaran, es Escòles Araneses, eth Grèmi d’Ostalaria dera Val d’Aran e er Archiu Generau d’Aran.