Era EMD d’Unha adjudique es òbres de restauracion deth campanau de Santa Eulàlia, que se poderà hèr visitable
Era òbra a estat adjudicada ara empresa Transports i Excavacions Barba, S.L. per un impòrt totau de 76.935,09 èuros (IVA includit). Era actuacion compde damb finançament dera Generalitat de Catalunya a trauès deth Pla Unic d’Òbres e Servicis de Catalunya (PUOSC), qu’i apòrte 73.901,13 èuros, mentre qu’era rèsta se corbís damb hons pròpris dera EMD d’Unha.
Era glèisa de Santa Eulàlia ei un temple d’origina romanica, bastit en sègle XII, damb ampliacions e intervencions posteriores des sègles XVI e XVIII. Eth campanau, plaçat en angle nòrd-oèst deth conjunt, siguec bastit en sègle XVIII e constituís un element destacat deth perfil arquitectonic deth pòble d’Unha.
Era intervencion actuau non sonque includís era consolidacion estructurau, senon tanben eth rebastiment integrau des escales interiores entà garantir un accès mès segur, foncionau e adequat ara visita publica. Aguesta actuacion permeterà qu’eth campanau vengue un espaci visitable damb totes es garanties de seguretat e accessibilitat, convertint-se en un nau mirador patrimoniau damb vistes privilegiades sus er entorn.
Era alcaldessa d’Unha, Esther Bruna (UA), a destacat que “aguesta ei ua actuacion fòrça demorada e que mos permet preservar un element emblematic deth nòste pòble e, ath madeish temps, hèr un pas endauant ena sua dubertura ara ciutadania”.
Bruna a remercat qu’aguesta restauracion “se hig ara auta sèrie d’actuacions impulsades en municipi de Naut Aran, coma es des campanaus de Salardú e Bagergue, que tanben s’an hèt visitables, en tot configurar un hilat de miradors patrimoniaus de gran interès”. En aguest sens, a soslinhat que “aguesta iniciativa balhe un valor ahijut ath pòble d’Unha, en tot aufrir era possibilitat de descorbir er entorn des d’un punt de vista arquitectonic unic e damb ues vistes espectaculars”.
Segontes era alcaldessa, “hèr visitable eth campanau non sonque supause conservar patrimòni, senon balhar-li vida e projeccion. Ei un plus de categoria e un impuls autant entàs visitants coma entà toti aqueri que viuem e estimam eth patrimòni deth nòste pòble”.
Era restauracion deth campanau refòrce eth compromís dera EMD d’Unha damb era conservacion e era projeccion deth sòn patrimòni istoric e culturau.