Era EMD de Bagergue comence es òbres de renovacion des trepaders deth Camin Pessòla

Aguest projècte ei possible gràcies ath finançament deth Plan Unic d'Òbres e Servicis de Catalunya (PUOSC) dera Generalitat de Catalunya, complementat damb hons pròpis dera EMD de Bagergue.

Era actuacion consistís ena renovacion complèta des trepaders deth Camin Pessòla, en tot substituir eth paviment actuau de pèira e ciment, qu'auie patit un important desgast dempús d'ans d'exposicion as incleméncies meteorologiques pròpries dera nauta montanha. Eth nau paviment serà de calada de granit, un materiau fòrça mès resistent, durable e plenament adaptat as condicions climatiques dera Val d'Aran.

Ua des principaus melhores ei era eliminacion des tradicionaus bordadures, de manèra que eth trepaders demorarà ath madeish nivèu dera cauçada. Aguesta solucion facilitarà er accès as viuendes, as garatges e as aparcaments, en tot melhorar era accessibilitat de totes es persones, especiaument des persones damb mobilitat redusida.

Ath delà, era desaparicion des bordaduers facilitarà fòrça es trabalhs de manteniment. Pendent er iuèrn, era maquinaria de retirada dera nhèu poderà trabalhar damb fòrça mès eficàcia sense provocar desperfèctes enes trepadèrs, en tot redusir atau es reparacions qu'era EMD auie d'assumir cad’an. Autant, eth nau dessenh permetarà un pas fòrça mès eficient dera barredora municipau, en melhorar era neteja des carrèrs e eth manteniment der espaci public.

Aguesta actuacion permet tanben contunhar unificant era imatge urbana de Bagergue, en consolidar era llambòrda de granit coma eth materiau de referéncia enes viaus publics deth pòble. Se tracte d'un materiau fòrça mès resistent, de major qualitat e damb un manteniment fòrça inferior ath des paviments tradicionaus de pèira e ciment.