Aran Amassa refuse l’increment generalisat des taxes e impòsti der Ajuntament de Vielha e Mijaran
Eth grop municipau Aran Amassa a votat en contra de tres prepauses claus presentades peth govèrn locau en darrèr Plen de l’Ajuntament de Vielha e Mijaran: era bonificació de l’ICIO entara “Casa deth Senhor d’Arròs”, era modificacion des ordenances fiscaus entà l’exercici 2026 e l’aprobacion deth pressupòst municipau entath madeish an.
"Era nòsta posicion arrespon a critèris de responsabilitat, equitat e defensa des interèssi dera ciutadania aranesa", an explicat es integrants deth Grop Municipau d'Aran Amassa a trauès d'un comunicat. Eth prumèr lòc, consideram qu'era bonificació dera G5 % de l’ICIO entath projècte de reabilitacion dera “Casa deth Senhor d’Arròs” non ei justificada coma òbra d’especiau interès municipau, donques que non implique un benefici dirècte ne immediat entath conjunt deth municipi.
Per çò qu'ei dera modificacion des ordenances fiscaus entath 2026, Aran Amassa refuse l’increment generalisat deth 2 % en taxes e impòsti, "atau coma autes pujades desproporcionades coma era dera taxa d’aucupacion de via publica, qu'aumente enquia un 50 %". Aguest increment per Aran Amassa "arribe en un moment mès que mès malaisit entà fòrça familhes e petiti negòcis, encara afectadi pera inflacion e l’alentiment economic, e non incorpòre cap mesure compensatòria ne bonificacions entàs collestius mès vulnerables o per aqueri qu'apòsten per practiques sostenibles".
Fin finau, Aran Amassa a votat tanben en contra deth pressupòst municipau entath 2026, pr'amor que "non ei realista, ignòre era situacion economica actuau e manca de vision de futur". Considèren qu'ei un pressupòst de continuitat, qu'incremente era pression fiscau sobri era ciutadania "mès non apòrte cap projècte transformador ne escomesa per un desvolopament sostenible e estrategic de la Vau d’Aran".
Dempús de d’Aran Amassa reclamen ua gestion mès rigorosa, eficienta e damb sensibilitat sociau, que priorize era inversion utila, era transparéncia e eth dialòg damb era ciutadania. "Eth nòste compromís ei damb es persones e damb un modèl d’Aran mès just, pròsper e sostenible", An manifestat.