Eth Conselh Generau d’Aran presidirà eth Consòrci Leader Pirenèu Occidentau

Pendent era tarde d’ager auec lòc en Tremp eth Plen deth Consòrci Leader Pirenèu Occidentau, a on s’escuelhec per unanimitat ara sindica d’Aran, Maria Vergés, coma presidenta d’aguest òrgan en nòm e representacion deth Conselh Generau d’Aran. Era vicepresidéncia requeirà ena Alta Ribagorça.

“Era Val d’Aran jamès auie assomit era presidéncia d’aguest òrgan, qu’a ua grana importància entar impuls de projèctes publics e privadi qu’ajuden a desvolopar, e deth govèrn d’Aran ençà demoram, en aguesta naua etapa, poder trabalhar e melhorar eth supòrt ath sector empresariau des nòsti territòris e impulsar projèctes transversaus que mos ajuden a diversificar era nòsta economia, retier eth talent des nòsti joeni e aufrir ua melhor qualitat de vida ara gent des Pallars, era Alta Ribagorça e Aran”, asseguraue era sindica d’Aran, en tot híger que: “deth govèrn d’Aran èm comprometudi e estenem era man entà trabalhar de manèra conjunta damb es auti territòris deth Pirenèu deuant des rèptes economics e sociaus que trauessam”.

Eth Consòrci Leader Pirenèu Occidentau ei er òrgan gestor des ajuts Leader ena Alta Ribagorça, Pallars Jussà, Pallars Sobirà e Val d’Aran. Es Leader son un metòde de desvolopament locau damb mès de vint ans de trajectòria entà hèr particèps as agents locaus en dessenh e metuda en foncionament d’estratègies, era prenuda de decisions e era assignacion de recorsi a trauès de hons europèus tath desvolopament des zònes ruraus.