Eth Conselh Generau d’Aran, a trauès de Foment Torisme Val d’Aran, a iniciat era campanha “Sabors d’Aran”, entà promocionar era gastronomia deth territòri a trauès des sòns restaurants, en tot dar a conéisher plats e productes tipics dera Val d’Aran.
“Damb aguesta campanha, cada setmana compartiram un vidèo gravat en collaboracion damb disparièrs restaurants deth territòri, a on codinèrs e codinères de gran nivèu mos ensenharàn a premanir autant plats tipics dera gastronomia aranesa coma plats innovadors damb productes dera tèrra”, explicaue eth conselhèr d’Economia, Torisme e Promocion Economica, Josep Canut.
“Er objectiu de ‘Sabors d’Aran’ ei promocionar es nòsti restaurants e era nòsta gastronomia per miei de contenguts audiovisuaus que pòden arribar a tot eth mon a trauès des naues tecnologies, en tot adaptar-mos ara actuau situacion sanitària e sociau”, manifestaue eth tanben conselhèr d’Economia, Torisme e Promocion Economica, Juan Antonio Serrano.
Restaurants coma Er Occitan, Casa Turnay, Es Arraïtzes, Boixetes de Can Manel o Era Mòla, entre d’auti, an participat en aguesta campanha en tot compartir quauques des sues melhors recèptes. Dejà se pòt veir eth prumèr d’aguesti vidèos e apréner a premanir ua sopa de ceba coma es que se premanissen en restaurant La Trastienda de Bossòst.
