Era Associacion aranesa ES PAUMS presentèc ager era sua Memòria d’activitats deth passat exercici 2019.Era Memòria amasse totes es activitats que era Associacion a amiat a tèrme tant ena Val coma dehòra dera Val.
Subergessen es activitats en airau musicau damb Concèrts de musica aranesa, era edicion de un disc CD damb cançons en aranés deth poèta Jusèp Condò interpretades pera Corau Es Paoesses e era composicion de Gràcies Senhor, ua òbra de caractèr religiós.
En airau de lengua Es Paums an revirat ar aranés er album “Es Jòies dera Castafiòre” des Aventures de Tintin e eth classic de Lewis Carroll “Alicia en país des meravilhes”. Ath delà era Associacion amie eth Grop de Convèrsa Aranesa dera Universitat de Lhèida.
En çò que tanh ath torisme celebrèren era dusau edicion deth “Concors de Fotografia, Vilamòs Tiò, natura e cultura”, que sage de difóner era beresa des paisatges dera Val.
En airau d’espòrts Es Paums organizèc era quatau edicion deth Torneg de Tènnis de Taula e era Corsa de BTT “Lairissa Bike 2019”.
Era gastronomia tanben auec un lòc ena programacion dera Associacion damb un sopar popular de “Paelha Paoessa”.
Eth cinèma damb era projeccion dera pellicula “Un òme coma d’auti” filmada en Vilamòs, completèc era sèria d’activitats.
Tar an 2020 Es Paums ja son en tot trabalhar en naui projèctes, restacadi damb era musica, era lengua e era cultura aranesa.
