20.08.2019 |
Viure als Pirineus

UNIVERSITATS

Signen eth convèni entà que es Pròves d'Accès ara Universitat se poguen hèr en aranés

Realizar es examens en aranés implique ua reconeishença ara trajectòria estudiantil des alumnes aranesi e un impuls ara plea integracion d'aguesta lengua ena societat catalana coma lengua veïculara damb efèctes juridics valids.

Era conselhèra d’Enterpresa e Coneishença, Àngels Chacón, eth sindic d’Aran, Carlos Barrera, e era vicerrectora d’Estudiants dera Universitat de Lhèida, Neus Vila/CGA
Era conselhèra d’Enterpresa e Coneishença, Àngels Chacón, eth sindic d’Aran, Carlos Barrera, e era vicerrectora d’Estudiants dera Universitat de Lhèida, Neus Vila/CGA
Signen eth convèni entà que es Pròves d'Accès ara Universitat se poguen hèr en aranés

Iniciauments era opcion der aranés s'includirà enes PAU d'enguan enes enonciats der examen d'Istòria, matèria obligatòria entà tot er alumnat, e en successives convocacions s'ampliaràn es matèries disponibles.

Era conselhèra d'Enterpresa e Coneishença, Àngels Chacón, eth Conselh Generau d’Aran e era Universitat de Lhèida (UdL), an signat aguest maitin eth convèni entà qu’es Pròves d'Accès ara Universitat se poguen hèr en aranés.

En acte de signatura an participat eth sindic d’Aran, Carlos Barrera, e era vicerrectora d'Estudiants dera Universitat de Lhèida, Neus Vila, en representacion dera Universitat de Lhèida (UdL). Era conselhèra Àngels Chacón, a estat acompanhada tanben deth secretari deth CIC, Lluís Baulenas, e deth cap deth burèu d'Accès ara Universitat, Jesús M. Prujà.

Aguest convèni met en evidéncia eth compromís deth Govèrn dera Generalitat en dar responsa ara diuersitat lingüistica de Catalonha. Damb er entratge der aranés enes PAU eth Govèrn non solaments fomente er emplec, era difusion e era coneishença der aranés, mès qu'impulse, ath delà, era sua normalizacion.

Era possibilitat de realizar es examens en aranés implique ua reconeishença ara trajectòria estudiantil des alumnes aranesi e un impuls important ara plea integracion d'aguesta lengua ena societat catalana coma lengua veïculara damb efèctes juridics valids.

D'aguesta manèra enes Pròves d'Accès ara Universitat de 2019 a que se presenten es estudiants d’Aran, s'includirà era opcion der aranés enes enonciats der examen d'Istòria, matèria obligatòria entà tot er alumnat. En successives convocacions se poderà ampliar es matèries en que s'establisque era opcion des enonciats en aranés.

Eth Conselh Generau d’Aran designarà es persones qu’amiaràn a tèrme era traduccion ar occitan aranés des enonciats des PAU e assumirà es despenses de traduccion ar aranés des enonciats des pròves que se determinen. Era traduccion se realizarà un còp barrat eth procès de maquetacion e edicion des enonciats en catalan e en castelhan, e es persones encargades dera traduccion auran de seguir eth protocòu de confidencialitat establit ena elaboracion des PAU.

Es còsti d’edicion e d’impression des enonciats der examen en occitan aranés, seràn assumidi pera Generalitat, a trauès deth Conselh Interuniversitari de Catalonha.
Era Universitat de Lhèida serà era encargada de provedir es mecanismes de besonh en cas que calesse era traduccion des responses des examens, entà qu’era sua correccion s’amie a tèrme en igualtat de condicions damb era rèste d’aspirants.

En aguest sentit, cau arrebrembar que Lourdes Bruna, escolana der Institut d’Aran e vesia d’Arties, siguec en 2017 era prumèra estudianta qu’arresponec en aranés dus examens dera fase especifica des PAU ena UdL, enes matèries de matematiques e fisica, quan demanèc poder examinar-se en aranés, donques ei lengua oficiau en Catalonha des der an 2006. Maugrat que non ère obligada a hèr es PAU, donques qu’auie corsat eth Batxibac (Bachillerat eth francés), Lourdes Bruna, optèc per hèr era fase especifica entà pujar era sua nòta d’accès ara universitat.

Eth sindic d’Aran Carlos Barrera, ha explicat que damb aguest convèni se barre era demanda istorica deth Conselh Generau d’Aran ara Generalitat de Catalonha entà qu’es estudiants dera Val d’Aran podessen auer era opcion de hèr les Pròves d’Accès ara Universitat en aranés.

Comentarios