PROGRAMA PIROSLIFE

Preocupacion deuant deth quatau atac de Cachou a bestiar equin en dues setmanes

Cachou a aucit a ua cavala joena d’uns 20 mesi en municipi de Vielha e Mijaran, eth quatau atac confirmat der exemplar a bestiar equin des deth passat 4 de seteme
Cavala-1024x497
photo_camera Cachou a aucit aguesta net a ua cavala joena d’uns 20 mesi en municipi de Vielha e Mijaran/CGA

Eth comportament predador de Cachou torne a deishar ua naua cavala mòrta, en aguest cas ua femelha joena d’uns 20 mesi, qu’er os tanben a aucit en municipi de Vielha e Mijaran.

Er atac s’a produsit pendent era net de deluns a dimars e damb aguest dejà son quate es atacs comptabilizadi a bestiar equin des deth passat 4 de seteme.

Deuant aguesta situacion ei previst qu’eth grop de trabalh tecnic s’amasse d’urgéncia entà valorar era qualificacion de Cachou coma os condicionat per recorsi trofics d’origen uman e es mesures a préner.

Eth conselhèr de Territòri, Paisatge e Gestion ambientau, Francisco Bruna, a mostrat eth sòn “sentiment d’impoténcia deuant d’aguesti atacs reïteradi deuant es quaus mos trapam condicionadi entà resòlver es problèmes des ramadèrs afectadi per uns protocòls molt aluenhadi dera realitat”.

Es tecniques deth Protocòl d’Intervencion damb Ossi enes Pirenèus son dividides temporaument en tres fases progressiues, aplicant tecniques cada còp mès agressives.

De forma pro resumida, ena prumèra fasa se realize eth diagnostic, seguiment e execucion de mesures proactiues e inici des mesures aversiues. Ena dusau fasa, se refòrcen es mesures aversiues e ena tresau, se eth grop de trabalh ac considère de besonh, se passe ara captura e retirada deth miei der exemplar. Se pòt consultar online era totalitat deth protocòl.

Pes mesures que contemple, “aguest protocòl d’ossi problematics ei ua formula que pòt foncionar damb un aute bestiar mès non damb er equin”, afirme Bruna. Cau rebrembar que’era prevencion sus bestiar equin ei fòrça dificil, pr’amor que non ei viable agropar-lo e protegir-lo pera net coma se hè damb er ovin. Ath delà, es moviments nocturns des ossi son imprevisibles e eth descalatge dera recepcion dera senhau deth colièr GPS hè molt dificil era proteccion efectiva d’aguest bestiar.

Eth conselhèr senhale tanben qu’es mesures que mèrque eth protocòl se pòden a arribar a alongar pendent fòrça temps e resulten pòc efectives entàs ramadèrs que patissen aguesta problematica.