Inauguracion oficiau der Autobús Transfronterèr entre era Val d’Aran e St.Gaudens

Aué diuendres 2 de junh s'a inaugurat oficiauments era linha de servici de transpòrt collectiu transfronterèr que junh era Val de Aran damb Comminges, en un acte celebrat en Centre Administratiu departamentau de St. Gaudens.

busaran2
photo_camera Transpòrt collectiu transfronterèr entre era Val d’Aran e Comminges.

Aué diuendres 2 de junh s'a inaugurat oficiauments era linha de servici de transpòrt collectiu transfronterèr que junh era Val de Aran damb Comminges, en un acte celebrat en Centre Administratiu departamentau de St. Gaudens.

Er acte d'inauguracion a estat presidit per Mme. Carole Delga, Presidenta dera Region Occitània / Pyrénées-Mediterranée e peth vicesindic d’Aran, Luís Carlos Medina, acompanhadi de Georges Méric, president deth Conseil départemental dera Haute Garonne, Anna Díaz, conselhèra de Torisme e Desvolopament Economic e José Antonio Boya, conselhèr de Territòri deth Conselh Generau d’Aran.

Eth vicesindic d’Aran Luís Carlos Medina, a destacat que “er objectiu d'aguesta naua linha de connexion ei facilitar es desplaçaments des usatgèrs deth transpòrt public transfronterèr e dar responsa ara demanda des ciutadans d'establir ua linha de transpòrt public collectiu que permete desplaçar-se des dera region de Comminges enquiara Val d’Aran, coma auie ja existit a principis deth sègle passat damb eth tramvia qu’enlaçaue aguesti dus territòris”.

Eth servici de transpòrt collectiu transfronterèr entre era Val d’Aran e Comminges, entrèc en foncionament eth passat 18 d'abriu.

Era naua linha d'autobús compde damb era participacion des dues enterpreses qu'aufrissen eth servici des linhes actuauments existentes a un e d'aute costat deth Pirenèu. En cas dera Val d’Aran era enterpresa ALSA e en cas francés era enterpresa EPTR.

busaran

Es oraris de connexion transfronterèr son es abituaus des linhes actuaus en cas dera Val d’Aran, des de Baqueira enquia Les, damb connexion enquia St. Gaudens per part dera companhia francesa. Eth prètz deth bilhet simple ei eth madeish laguens era Val d'Aran, qu'ei de 1,10 € peth trajècte entre Baquiera e Les. Eth viatge des de Les enquia St. Gaudens còste 2,20 €.

Es oraris deth servici de deluns a diuendres se pòden consultar ací http://www.conselharan.org/wp-content/uploads/2017/06/Folleto-BUS-FRANÇA-2017-estiu.pdf

Era intencion deth Govèrn d’Aran e deth Conseil départemental dera Haute Garonne, ei qu'en un futur aguest servici de transpòrt connècten tanben des de St. Gaudens enquia Toulouse per tren.