14.12.2019 |
Viure als Pirineus

INSTITUCIONS

Eth sindic d’Aran demane comparéisher en Parlament de Catalunya

Francés Boya:“ei primordiau qu’eth govèrn dera Val d’Aran, a trauès deth sòn sindic, pogue explicar en sedenca parlamentària, quina ei era situacion actuau e es besonhs de futur d’Aran”.
Eth sindic d’Aran demane comparéisher en Parlament de Catalunya

Eth plen deth Conselh Generau d’Aran aprovaue eth passat dimèrcles, 13 de noveme,  ua declaracion institucionau entà reclamar ath Parlament de Catalunya que balhe compliment ar article 80.2 dera Lei d’Aran que dicte que: “Aumens un còp ar an s’a de celebrar un debat sus era situacion d’Aran e eth desvolopament deth sòn autogovèrn ena comission parlamentària que correspone”, un debat qu’atau coma dicte era lei “a de començar damb ua exposicion deth sindic d’Aran”.

Eth plen deth Conselh, per unanimitat, acordèc aprovar aguest acòrd que inste ath Parlament de Catalunya e ath sòn president a ordenar, damb era maxima celeritat possibla, eth compliment der article 80 dera Lei d’Aran entà perméter era compareishença deth sindic d’Aran e daurir eth debat corresponent ara situacion der autogovèrn aranés. 

Eth plen deth Conselh Generau d’Aran aprovaue dimèrcles, per unanimitat, era declaracion institucionau presentada peth govèrn aranés entà instar ath Parlament a complir damb er article 80 dera Lei d’Aran que lo mandate a debàter sus er autogovèrn aranés a trauès dera compareishença deth sindic aumens un còp ar an

Entath sindic d’Aran, Francés Boya, “ei primordiau qu’eth govèrn dera Val d’Aran, a trauès deth sòn sindic, pogue explicar en sedenca parlamentària, quina ei era situacion actuau e es besonhs de futur d’Aran”.

Parallelament, segontes afirme eth sindic, “eth govèrn a encomanat un informe juridic sus era situacion der autogovèrn aranés entà conéisher toti es detalhs e condicions des competéncies transferides pera Generalitat, entà saber quines son reaument ua competéncia reau o en quini àmbits aqueres competéncies son sonque de gestion o de tipe administratiu”.

Comentarios