Eth projècte "Piramida de còrda" des alumnes de 3au d'ESO der Institut d’Aran a estat eth guanhador de Rèpte Aran 2018.
Seishanta alumnes de 3au d'ESO der IES d’Aran an format es desparières equipes qu'an participat ena edicion de 2018 de Rèpte Aran. Rèpte Aran ei ua prepausa que cerque estimular er esperit innovador des adolescents e joens dera Val d’Aran a compdar des besonhs deth territòri en matèries diuèrses. Es equipes formades entre 3 e 5 alumnes, auien de generar un projècte de melhora restacada ara solidaritat, era educacion, era tecnologia, era ecologia, eth benéster, era cultura o er espaci public ena Val d’Aran.
Eth projècte Rèpte Aran a compdat damb era collaboracion dera Oficina de Joenessa deth Conselh Generau d’Aran, er IES d’Aran, eth Grèmi d'Ostalaria dera Val d’Aran, Combinats e era Fondacion Goteo.
Fin finau, eth passat 21 de deseme en un acte celebrat en Otèl Tuc Blanc de Baqueira Beret eth projècte "Piramida de còrda" siguec escuelhut guanhador de Rèpte Aran 2018. Es auti projèctes finalistes sigueren "Banc deth temps" e "Pumptrack - parc de ròdes".
Eth projècte guanhador s'amiarà a tèrme en gèr e es alumnes dera equipa gaudiràn de dues nets en Otèl Cesar Augustus de Cambrils en mes de mai.
