20.10.2019 |
Viure als Pirineus

Eth Plen deth Conselh Generau d’Aran apròve eth pressupòst de 29.349.297 € entad an 2019

Eth Pressupòst aprovat damb es vòts de CDA e era abstencion d’UA-PSC e PRAG represente un increment de mès deth 6% respècte der an anterior

Eth Plen deth Conselh Generau d’Aran a aprovat eth pressupòst 2019/CGA
Eth Plen deth Conselh Generau d’Aran a aprovat eth pressupòst 2019/CGA
Eth Plen deth Conselh Generau d’Aran apròve eth pressupòst de 29.349.297 € entad an 2019

th Plen deth Conselh Generau d’Aran a aprovat aué eth pressupòst dera maximala institucion aranesa entad an 2019 damb un impòrt de 29.349.297 € que represente un increment deth 6’3% respècte deth pressupòst der an 2018. Eth 3’3% d’aguest increment correspon as negociacions damb era Generalitat de Catalonha e er aute 3% a convènis e programes europèus.

Eth sindic d’Aran Carlos Barrera, expliquèc qu’eth pressupòst deth Conselh Generau d’Aran entad an 2019 contemple 1 milion d’èuros en inversions, que destaquen es 400.000 € entath refugi dera Honeria qu’ei un projècte de reequilibri territoriau. 105.000 € ath renfortiment e melhora interiora dera estructura dera glèisa de Sant Joan d’Arties. 100.000 € ara melhora dera Aubèrja “Era Garona” de Salardú, que li cau ahíger es 200.000 € d’inversion pera part der operador Fundació Pere Tarrés. 80.000 € entad aquesiment de naui sistèmes informatics deth Conselh Generau d’Aran. 286.000 € entad aquesiment de 2 naues ambulàncies e dera equipa d’electromedicina des madeishes. 75.000 € entad aquesiment d’un nau ecograf der Espitau dera Val d’Aran. Ad aguestes inversions cau somar es 466.000 € deth convèni damb era Deputacion de Lhèida corresponents ar equipament quirurgic deth dusau quirofan der Espitau dera Val d’Aran, que non s’an incorporat as inversions donques encara non ei signat eth convèni.

En aguest sens eth sindic d’Aran a arrebrembat qu’en pressupòst der an 2018 eth Conselh Generau destinèc 3’5 milions d’èuros a inversions entath bastiment dera naua residéncia geriatrica de Sant Joan deth Baish Aran, e es 1’4 milions cofinançadi a trauès deth projècte FEDER 2014-2020, era Deputacion de Lhèida e eth madeish Conselh Generau d’Aran entara melhora des accèssi ath medi naturau.

Es partides mès destacades deth pressupòst son es de Salut e Benéster damb mès de 13 milions d’èuros e un increment important ena partida de Pompièrs e Emergéncies que gestione tota era part deth transpòrt sanitari e que dispòse d’un pressupòst de 2.456.819 €. Carlos Barrera, a manifestat qu’aguest ei un pressupòst que da responsa a totes es responsabilitats qu’a eth Conselh Generau e es quaus a artenhut coma traspàs de competéncies, ara demora d’arribar a un acòrd damb era Generalitat de Catalonha en çò que tanh ath modèl de finançament entad Aran. Aguest acòrd segontes expliquèc eth sindic d’Aran, contemplarie er increment d’un 3’3% entara gestion des pròpries competéncies deth Conselh Generau d’Aran a trauès deth cual s’aplicarie eth madeish creishement pressupostari qu’eth dera pròpria Generalitat çò que permeterie priorizar es inversions estructuraus qu’a de besonh era Val d’Aran.

Eth Plen deth Conselh Generau d’Aran tanben a tractat sus eth nau modèl de Servici Integrau de Pompièrs e Emergéncies qu’eth Govèrn d’Aran negòcie damb eth departament d’Interior dera Generalitat. En aguest punt eth sindic d’Aran a explicat qu’en aguest moment manque mantier ua darrèra amassada damb eth conselhèr d’Interior Miquel Buch entà tractar de barrar er acòrd qu’arreconeish eth desvolopament dera Lei de regim especiau d’Aran de 2015.

Eth Plen deth Conselh Generau d’Aran a aprovat era modificacion deth contracte mixte de Gestion integrau dera recuelhuda e evacuacion de residus dera Val d’Aran. Eth sindic d’Aran a explicat que ja hè 3 ans se realizèc ua pròva pilòt de recuelhuda de residus de fraccion organica des grani productors (Otèls e restaurants) qu’auec fòrça bona acuelhuda e boni resultats. Est an passat se repetic e ei per açò que se prepause aguest ampliament deth contracte entà enguan. Carlos Barrera expliquèc que tanben se cerque ua solucion entà adaptar eth servici de recuelhuda selectiva as besonhs reaus dera Val d’Aran. En contracte iniciau se prevedie era recuelhuda un jorn de cada dus e era realitat actuau mòstre eth besonh de recuelhuda jornalièra enes nuclèus mès importants dera Val d’Aran.

Comentarios