Eth Conselh Generau d’Aran dejà a dessenhat es mesures de regulacion ath miei naturau enes zònes damb mès afluéncia pendent es dies 7 de junhsèga e 7 de seteme. Aguestes mesures an coma objectiu controlar era massificacion en set punts dera Val d’Aran: Varradòs, era Artiga de Lin, Aiguamòg, Valarties, Bassa d’Arres, Bassa d’Oles e Bausen.
“Deth govèrn deth Conselh Generau d’Aran ençà pensam qu’ei imprescindible regular aguest accès entà garantir era seguretat des usatgèrs e usatgères d’aguestes pistes e entà preservar aguesti endrets naturaus”, afirmaue eth conselhèr d’Economia, Torisme e Promocion Economica, Juan Antonio Serrano, en tot híger que: “pendent uns dies ar an, s’a constatat era afluéncia massiva ad aguesti punts e pensam que regular-ne er accès ei imprescindible entà melhorar era experiéncia des visitants e entà diversificar e dar a conéisher tanben d’autes zònes mens visitades deth nòste territòri e igualment espectaculars”.
“Aguestes mesures s’amiaràn a tèrme a trauès de diuèrsi vigilants que se plaçaràn en accès ad aguesti paratges e que regularàn eth pas segontes era ocupacion e places liures que i age enes parcatges”, explicaue eth tanben conselhèr d’Economia, Torisme e Promocion Economica, Josep Canut, “aguest ostiu se meterà en foncionament ua pròva pilòt entà reservar parcatge ena Artiga de Lin e Aiguamòg mejançant ua app que generarà un còdi de barres que permeterà er accès ad aqueres persones qu’agen reservat per auança e, qu’ath delà, mostrarà er estat de massificacion des set punts enes que segule er accès”.
Es donades obtengudes enguan, serviràn entà elaborar un plan de mobilitat dera Val d’Aran, que permeterà establir es mesures adientes en aguesta matèria pendent es pròplèus ans.
Aguesta ei ua des actuacions mès importantes desvolopades enguan en marc deth Plan de Sostenibilitat Toristica dera Val d’Aran, un plan a desvolopar en 3 ans e qu’ei dotat d’uns 2,5 milions d’euros per part der Estat.
