Eth govèrn deth Conselh Generau d’Aran a prepausat a Frederic Vergés coma candidat entath Prèmi Robèrt Lafont, e atau ac comuniquèc dies endarrèr ara Generalitat de Catalunya. Totun, aué eth Plen deth Conselh Generau a ratificat aguesta prepausa.
Eth sindic d’Aran afirme que Vergés “merite aguest reconeishement per nombrosi motius, especiaument pr’amor qu’a estat, ei e serà eth referent de fòrça generacions en impuls, ensenhament e estudi der aranés, mès tanben pera sua categoria umana que li a hèt a estimar eth sòn país e era sua lengua e cultura, transmetent es coneishements e valors a totes es persones qu’an agut eth plaser de coneisher-lo”.
Rebrembam qu’eth Prèmi Robèrt Lafont, concedit peth departament de Cultura dera Generalitat de Catalunya, a coma objectiu reconéisher e premiar as persones o entitats que s’agen distingit pera defensa, projeccion e promocion dera lengua aranesa e occitana en totes es sues variants, en quinsevolh punt deth domini lingüistic.
Frederic Vergés Bartau a ua longa trajectòria coma militant actiu dera lengua e cultura d’Aran. De 1974 ençà a impartit classes e corsi d’aranés autant tà adults coma tàs alumnes des estudis aranesi, mèstre de mèstres e responsable deth reciclatge deth professorat, siguec eth prumèr defensor dera apertenéncia der aranés ath dialècte gascon, a estat membre dera Comission entar estudi dera Normativa Lingüistica Aranesa, director deth Centre de Normalizacion Lingüistica deth Conselh Generau d’Aran e president dera Seccion de Lingüística der IEA enquia 2011, e actuaument ei president deth Centre d’Estudis Aranesi
Ei autor e coautor de lèu ua vintea de publicacions en aranés, e de mès d’ua desena de publicacions didactiques en aranés entara escòla e, ena actualitat, trabalhe ena elaboracion deth diccionari castelhan-aranés damb ues 45.000 entrades, ua òbra fòrça de besonh e demorada e que daurirà un abans e un dempús en usatge dera lengua d’Aran.
Per aguesti motius e peth sòn long curriculum, eth govèrn aranés lo considère coma meritat candidat ad aguest reconeishement.
Pendent eth plen, s’a procedit tanben ath nomenament des representants deth Conselh Generau d’Aran en plen deth Consòrci Leader Pirenèu Occidentau e s’a aprovat eth document de bases en favor d’ua naua economia entàs pòbles petits.
