20.09.2020 |
Viure als Pirineus

TORISME DE BENÈSTER

Aran premanís un seteme damb mès d’un centeat d’activitats centrades en suenh dera salut

Damb er objectiu de dinamizar eth mes de seteme e apostar per un torisme de benèster
Eth Conselh apòste per un torisme de salut e benestar/CGA
Eth Conselh apòste per un torisme de salut e benestar/CGA
Aran premanís un seteme damb mès d’un centeat d’activitats centrades en suenh dera salut

Entath mes de seteme eth Conselh Generau d’Aran, a trauès de Foment Torisme Val d’Aran, a organizat ua complèta agenda damb mès de cent activitats centrades en benèster dirigides autant a visitants coma a vesins e vesies deth territòri, damb er objectiu de consolidar Aran coma un endret beneficiós entara salut, perfècte entà agarrar fòrces e renauir còs e ment.

Compdant damb er entorn mès saludable coma scenari, pendent eth mes que ven s’amiaràn a tèrme sessions de iòga integrau, iòga entà gent grana, hatha vinyasa, biogroove, qi gong, kundalini, pranayama, taichí, iòga en familha, iòga entà mainatges e dansa urbana. S’an programat tanben diuèrsi talhèrs de codina sana, astrologia, meditacion, condes e cants.

Ath delà, cada dia aurà lòc ua gessuda per rotes emblematiques dera Val d’Aran coma Uelhs deth Joèu, Artiga de Lin e Pomero, Salardú, ermita de Corilha e Gessa, Banhs de Tredòs, còva de Bossòst, bòsc de Conangles, Aiguamòg…

Benestar i Salut Aran bis

(Foto: Conselh Generau d'Aran)

Entà amiar a tèrme totes aguestes activitats, “compdaram damb era collaboracion de grani especialistes en cada ua d’aguestes modalitats, mès tanben damb d’auti professionaus coma fisioterapeutes, osteopates e d’auti qu’aufriràn servicis de benèster de forma individuau”, afirme eth conselhèr d’Economia, Torisme e Promocion Economica, Juan Antonio Serrano, en tot híger que: “volem dinamizar eth mes de seteme en tot demostrar qu’èm un territòri saludable, damb un entorn net e descongestionat e ua amplia aufèrta d’activitats e terapies naturaus”.

“Er entorn naturau dera Val d’Aran aufrís infinides possibilitats e pensam que, ara mès que jamès, era gent ei conscient dera importància dera salut”, apunte eth conselhèr d’Economia, Torisme e Promocion Economica, Josep Canut: “damb aguest mes deth benèster complementaram es activitats fisiques, de relaxacion e connexion damb un madeish, damb es nòsti paisatges, gastronomia e auviatge culturau entà incrementar es resultats d’aguesta experiéncia unica”.

Aran premanís un seteme damb mès d’un centeat d’activitats centrades en suenh dera salut
Comentarios