28.09.2020 |
Viure als Pirineus

AUDIOVISUAU

Eth Conselh Generau d’Aran impulse era prumèra sèrie de television en aranés

'Èm çò qu’èm' s’estrearà ena television a finaus d’aguest mes de seteme
'Èm çò qu’èm' s’estrearà ena television a finaus d’aguest mes de seteme/CGA
'Èm çò qu’èm' s’estrearà ena television a finaus d’aguest mes de seteme/CGA
Eth Conselh Generau d’Aran impulse era prumèra sèrie de television en aranés

En tot cercar naues formules entà auançar ena defensa e promocion der aranés, eth govèrn Conselh Generau d’Aran a apostat peth format audiovisuau damb Èm çò qu’èm, ua naua sèrie en aranés, coprodusida pera maxima institucion aranesa e Lleida TV a trauès dera productora Kionalia Project. Er airau de politica lingüistica deth Conselh Generau d’Aran a premanit es tematiques a tractar e a revirat e supervisat es guions d’aguesta nauèra sèrie que s’estrearà ena television a finaus d’aguest mes de seteme.

Sèrie aranesa bis

Aguest nauedós producte audiovisuau a coma principau finalitat hèr arribar era lengua a un public extens en un format pòc explotat enquia ara. Segontes afirme eth sindic d’Aran, Francés Boya, “auem volut emplegar un esturment tant potent coma son es contenguts audiovisuaus entà impulsar era promocion e normalizacion der aranés pr’amor que, a despièch des dificultats damb es que mos trapam entà poder desplegar ua politica lingüistica eficaç tà esvitar era desparacion der aranés, consideram indispensable qu’era nòsta lengua pròpria compde damb es madeishi recorsi qu’an d’autes lengües oficiaus” e hig que: “tath govèrn deth Conselh Generau d’Aran era qüestion lingüistica ei un ahèr clau, pr’amor que sense era lengua non existirien ne era nòsta singularitat ne eth nòste autogovèrn”.

Èm çò qu’èm aurà un totau de 15 capítols e serà protagonizada pera intelligéncia artificiau SIA, ua expèrta ena lengua pròpria d’Aran, acompanhada de d’auti personatges interpretadi per actors e actritzes deth territòri.

“Damb aguesta produccion non sonque trabalham ena normalizacion dera lengua, senon que tanben dam visibilitat ath gran talent que i a ena Val d’Aran”, assegure eth sindic d’Aran ath temps qu’arregraís a totes es persones que i an participat “era sua dedicacion e volontat de collaborar en impuls der aranés”.

Aguest pionèr projècte prebotjarà er aranés e incidirà, de forma agradiua e damb umor, en aqueri aspèctes enes quaus se cometen mès errors e genèren mès dubtes.

Eth Conselh Generau d’Aran impulse era prumèra sèrie de television en aranés
Comentarios