21.06.2021 |
Viure als Pirineus

ARANÉS

Eth Conselh Generau d’Aran cree eth Conselh Consultatiu der Aranés

Pendent era session plenària d’aué, eth Conselh Generau d’Aran a aprovat (damb es vòts a favor deth grop d’UA e era abstencion de CA) eth reglament regulador deth Conselh Consultatiu der Aranés.
Conselh Generau d'Aran
Eth Conselh Generau d’Aran a aprovat eth reglament deth Conselh Consultatiu der Aranés / CGA
Eth Conselh Generau d’Aran cree eth Conselh Consultatiu der Aranés

Pendent era session plenària d’aué, eth Conselh Generau d’Aran a aprovat (damb es vòts a favor deth grop d’UA e era abstencion de CA) eth reglament regulador deth Conselh Consultatiu der Aranés.

“Eth Conselh Generau d’Aran, qu’ei era administracion competenta en matèria de lengua, cree aguest òrgan entà compdar damb ua assessoracion e consulta en matèria de politica e planificacion lingüistiques”, afirmaue era sindica d’Aran, Maria Vergés, e higie que “er objectiu d’aguest òrgan ei trabalhar entara vitalitat sociau der aranés e balhar es criteris tecnics e lingüistics de besonh entà qu’es accions e politiques de promocion, normalizacion e difusion dera lengua agen un impacte positiu e dirècte ena perviuença der aranés”.

Eth Conselh Consultatiu der Aranés analisarà es factors que tanhen ara vitalitat sociau dera lengua, prepausarà trabalhs de recèrca e repòrts, analisarà tanben es accions de política lingüistica qu’agen incidéncia en Aran, cossent damb er objectiu de promòir er emplec e coneishement der aranés, e dessenharà accions e politiques entà promòir er emplec dera lengua en toti es encastres dera societat aranesa, e entara disponibilitat de productes e servicis en aranés.

“Entà arténher aguesti objectius, eth Conselh Consultatiu der Aranés ei format per professionaus de reconeishut prestigi, e trajectòria, autors de nombroses publicacions e coneishedors dera nòsta lengua e der encastre occitan, membres de diuèrses universitat e organismes, coma era Universitat de Sorbonne o era Universitat de Lleida”, explicaue Vergés.

En aguest sens, era sindica remercaue “eth besonh imperiós de non emplegar era lengua coma esturment politic, entà assegurar-ne era continuitat” e a instat a toti es conselhèrs e conselhères deth Plen deth Conselh Generau d’Aran a “trabalhar conjuntamente entà evitar era desaparicion der aranés”.

Entre d’auti ahèrs, en Plen amiat a tèrme aguest maitin s’an aprovat tanben eth Manuau d’Identitat Corporativa deth Conselh Generau d’Aran, qu’a coma objectiu unificar e armonizar era imatge dera maxima institucion aranesa e es airaus qu’en depenen.

Eth Conselh Generau d’Aran cree eth Conselh Consultatiu der Aranés
Comentarios