Eth Conselh Generau d’Aran amplie es installacions deth centre de recuelhuda de residus de Vielha

Ei previst qu'es òbres de reforma siguen finalizades eth pròplèu mes de noveme

valdaran
photo_camera Installacions deth centre de recuelhuda de residus de Vielha

Eth Conselh Generau d’Aran a començat es òbres de reforma e ampliacion deth centre de recuelhuda de residus de Vielha entà aumentar era capacitat de disposicion de contienedors entà incrementar era recuelhuda selectiva de residus ena Val d’Aran.

Entà minimizar eth volum a sanejar e poder aumentar era capacitat des contienedors dera recuelhuda s'a adoptat un dessenh des murs en “espia de peish”, çò que s'a passat d'ua capacitat de seleccion de 5 a 14 contienedors. En tot adaptar d'aguesta manèra era recuelhuda as requisits d’omologacion establidi pera Agéncia Catalana de Residus.

Per d'auta part s'an analisat es trajectòries des veïculs pesadi en centre de recuelhuda, ara fin de verificar qu'es veïculs de besonh entath sòn foncionament poguen accedir e desvolopar es prètzhèts de besonh corrèctaments. S'a ampliat era longitud dera pòrta d'accès entà perméter era gessuda de camions tipe trailer.

Eth Govèrn d’Aran, a destinat un pressupòst de 374.446 € ara inversion d'aguest equipament, que tanben a previst era resèrva d'espacis entà futures installacions complementàries, coma son eth sistèma de compactatge de carton e eth sistèma de compactatge e trissatge de contengut des contienedors, que se realizaràn en un futur.

Ei previst qu'es òbres de reforma siguen finalizades eth pròplèu mes de noveme.

Eth conselhèr de Territòri d’Aran, José Antonio Boya, a destacat que totes es accions qu'en aguest sens amie a tèrme eth Conselh Generau d’Aran en àmbit dera melhora dera gestion des residus, an de servir entà estimular ara ciutadania ena contribucion dera recuelhuda selectiva e entà qué non se dèishen determinadi residus ath costat des contienedors urbans qu'an d'èster depausadi en centre de recuelhuda de residus.