Eth Conselh Generau d’Aran, mejançant era enterpresa SAVA S.L. (Servicis Ambientaus dera Val d'Aran) e en collaboracion damb er Avescat d'Urgelh, a amiat a tèrme diuèrses accions de manteniment e melhora enes glèises de Bausen, Betlan e Montcorbau.
En cas dera glèisa de Bausen, es trabalhs an consistit ena consolidacion e apariament deth campanau dera glèisa de San Pèir ad Vincula, a on s'an realizat trabalhs de consolidacion dera escala d'accès ath campanau e hargat de darrèr nivèu entad accès as campanes. Era glèisa parroquiau ei d'inicis deth sègle XVIII, que ne destaque er arc d'entrada dera sua pòrta reneishentista bastida en 1709.
Enes darrèri ans, eth Conselh Generau d’Aran, ja a realizat òbres coma era substitucion dera cobèrta e faus tet e de paviment e pentura.
Damb aguesta accion, s'a melhorat era estabilitat deth hargat, s'a virat era escala entà arténher que totes es bigues deth hargat siguen encastrades en mur perimetrau e s’a tractat era husta damb dues mans de proteccion e vernís. Eth pressupòst destinat ad aguesta accion a estat de 11.655,95€.
En Montcorbau, s'an rebastit es planheròts e escales interiores deth campanau dera glèisa de Sant Esteve. Damb era fin de substituïr es hargats, s'an realizat diuèrses accions coma era retirada de campanes, demolicion manuau de hargats e escales, collocacion de bigues de husta laminada en hargats, collocacion d'escales de husta e era recreacion dera cagira deth campanèr damb còrdes e pedals entà tocar es campanes. Eth pressupòst d'aguestes accions ei de 11.563,33€.
Fin finau ena glèisa de Betlan, s'an realizat trabalhs d'apariament deth solèr e s'an rehèt era escala e era parabanda damb un pressupòst de 3.350€
