Eth Conselh Generau adjudique eth projècte de melhora d’un tram dera Pista de Varradòs

Aguesti trabalhs condicionaràn eth tram dera pista de Varradòs que va de Bagergue ath Saut deth Pish
Pista Varradòs Val d'Aran
photo_camera Eth Conselh Generau adjudique eth projècte de melhora dera Pista de Varradòs / CGA

Eth Conselh Generau d’Aran a adjudicat dejà eth sòn projècte de melhores e manteniment de camins ena Val d’Aran, un projècte dotat d’un pressupòst de 150.000 euròs qu’anaràn destinadi ath tram dera Pista de Varradòs entre era Bòrda des de Perú (Bagergue) e eth Pònt de Varradòs ath Saut deth Pish, un tram que compde damb un totau de 14,2 km.

“Era actuacion en aguesta pista ei fòrça de besonh pr’amor que se tracte d’un camin d’accès a un punt de gran interés naturau e toristic coma ei eth Saut deth Pish e qu’actuaument se trape en un estat fòrça maumès pr’amor dera erosion dera nhèu e er aigua”, explicaue eth conselhèr de Territòri, Paisatge e Gestion Ambientau, Francés Bruna, en tot híger que: “eth Saut deth Pish compde damb un accès per Pònt d’Arròs fòrça massificat pendent es mesi d’ostiu mès, damb aguesti trabalhs, se demore poder dar ua naua entrada ad aguesta zòna des dera poblacion de Bagergue, en tot daurir atau ua via de comunicacion entre aguesta poblacion e eth pòble d’Arròs”.

En aguest sens, eth conselhèr Bruna manifestaue que: “daurir aguesta via pòt èster beneficiós entath nuclèu de Bagergue, que compde sonque damb ua carretèra d’accès, pr’amor qu’en cas d’amiar a tèrme trabalhs ena aguesta carretèra, poirien compdar damb ua dusau gessuda entà tot tipe de veïculs”.

Aguesta acctuacion a estat subvencionada peth Departament de Vicepresidència i Polítiques Digitals i Territori dera Generalitat de Catalunya, laguens dera linha d’actuacions de melhora e manteniment de camins der hilat vesiau e rurau enes comarques de montanha e en Aran 2021.