11.12.2018 |
Viure als Pirineus

POMPIÈRS

Es Pompièrs d’Aran an celebrat eth dia dera sua patrona Santa Barbara

Generalitat e Conselh Generau an establit es terminis entà implementar era estructura e eth finançament deth Servici Integrau de Gestion des Emergéncies des dera Val d’Aran a compdar deth mes de hereuèr de 2019

Eth sindic d’Aran, Carlos Barrera, a presidit es actes de celebracion de Santa Barbara, acompanhat deth secretari generau deth Departament d'Interior dera Generalitat, Brauli Duart/Conselh Generau d'Aran
Eth sindic d’Aran, Carlos Barrera, a presidit es actes de celebracion de Santa Barbara, acompanhat deth secretari generau deth Departament d'Interior dera Generalitat, Brauli Duart/Conselh Generau d'Aran
Es Pompièrs d’Aran an celebrat eth dia dera sua patrona Santa Barbara

Eth sindic d’Aran, Carlos Barrera, a presidit es actes de celebracion de Santa Barbara, patrona deth còs des Pompièrs dera Val d'Aran, acompanhat deth secretari generau deth Departament d'Interior dera Generalitat, Brauli Duart, deth director generau de Prevencion, Extincion d'Incendis e Sauvaments, Manuel Pardo e deth conselhèr delegat de Pompièrs Emergències d’Aran, Joan Canalias.
Era celebracion a començat damb tòcs de sirènes pes pòbles dera Val de Aran damb es veïculs des Pompièrs, ara seguida s'a oficiat era missa ena glèisa de Santa Maria de Mijaran en aunor a Santa Barbara, e ar acabar es Pompièrs an celebrat eth dia dera sua patrona en parc de Pompièrs de Vielha e Mijaran damb toti es convidadi, conselhèrs deth Govèrn d’Aran e deth Conselh Generau d’Aran, bailes e representants des còssi e fòrces de seguretat de Catalonha, Espanha e França, amassa damb eth rèste de ciutadans.
Ara ora des parlaments, eth secretari generau deth Departament d'Interior, Brauli Duart, expliquèc qu'eth Departament d'Interior dera Generalitat e eth Conselh Generau d’Aran acaben de premanir, dempús de 6 mesi de negociacions, es acòrds entà començar eth nau modèl de Gestion Integrau d'Emergéncies d’Aran pera part deth Conselh Generau d’Aran, a compdar dera reconeishença dera singularitat dera Val d’Aran ena Lei 1/2015 deth regim especiau d’Aran en Parlament de Catalonha.
Eth sindic d’Aran, Carlos Barrera, manifestèc que dempús d'aguesti mesi de negociacion ja s'an establit es terminis entà implementar eth Servici Integrau de Gestion des Emergéncies des dera Val d’Aran. Carlos Barrera, didec qu'aguest nau servici s'implantarà damb un finançament equitatiu envèrs d'auti territòris de Catalonha a on eth servici d'Emergéncies ei desplegat. Eth sindic d’Aran a dit qu'er objectiu ei barrar er acòrd definitiu eth pròplèu mes de gèr e barrar era estructura e eth finançament deth servici en hereuèr de 2019.
En aguest sentit, eth sindic d’Aran a explicat qu'er inspector deth còs de Pompièrs dera Generalitat, Manel Bosch, serà eth coordinador deth servici que trabalharà amassa damb era equipa tecnica formada per Joan Canalias, Lluís Rodríguez e Fina Calvo.
Fin finau, Carlos Barrera, hec referéncia ara amassada mantenguda ager damb eth President dera Generalitat, Quim Torra, ena qu'acordèren qu'eth Conselh Executiu deth Govèrn dera Generalitat s'amassarà ena Val d’Aran abantes de finalizar eth mes de hereuèr der an pròplèu entà testimoniar eth sòn respècte e reconeishença entath pòble aranés.

Comentarios