29.11.2020 |
Viure als Pirineus

EDUCACIÓ

Es escòles dera Val d’Aran receberàn formacion contra eth sètge escolar

A trauès dera iniciativa der airau de benèster deth Conselh Generau d’Aran
 
Institut d'Aran/CGA
Institut d'Aran/CGA
Es escòles dera Val d’Aran receberàn formacion contra eth sètge escolar

Eth pròplèu 9 de seteme es escòles Sant Ròc, Garona, Loseron, Ruda, Sant Martí e Castèth Leon, atau coma er Institut d’Aran e er EAP receberàn era formacion deth programa KIVA en matèria de sètge escolar.

Pr’amor dera crisi sanitaria provocada pera COVID-19 e entà garantir ua major seguretat deth professorat, aguesta formacion impartida per tres agents KIVA s’amiarà a tèrme en tres espaci diferenciadi, en tot dividir ath professorat e complir damb es limitacions d’aforament.

Eth projècte KIVA contra eth sètge cerque trabalhar non sonque damb era victima e er assatjador, senon que vò hèr a veir ath conjunt der escolanat que toti amassa pòden cambiar aguesta situacion. Ja qu’ei comprovat qu’es observadors an un ròtle clau entà acabar damb eth bullying e pòden decidir èster part dera solucion en compdes d’ignorar eth problèma.

CEIP Garona de Vielha

(CEIP Garona de Vielha)

Eth govèrn d’Aran ei totaument comprometut damb  era luta contra es problematiques sociaus qu’afècten ara poblacion, coma pòt èster eth sètge o era violéncia de genre, e pròva d’açò ei eth trabalh que desvolope eth departament d’Igualtat, Salut e Benèster ençà entà cercar  solucions ad aguestes lacres sociaus.

“Es donades mos demòstren qu’era Val d’Aran non ei aliena ad aguesta problematica e qu’eth sètge escolar ei present en nòste territòri” manifèste era vicesindica Maria Vergés, e hig que: “damb aguest programa eth govèrn deth Conselh Generau preten redusir aguestes donades, sustot trabalhant dera prevencion ençà e en coordinacion damb eth pròpri departament d’Ensenhament dera Generalitat”.

Entà Angelina Cases, conselhèra de Coneishement, “era apòsta que hè eth govèrn damb aguest ahèr, tot e non auer competéncies en airau educatiu, demòstre tanben er interés qu’auem ena educacion en Aran”.

Eth programa KIVA, qu’a era sua origina en Finlandia e qu’a dejà uns ans de rodatge damb fòrça boni resultats, cerque melhorar era conviuença escolara en tot redusir e previer es casi de sètge e minimizar es sòns efèctes negatius.

Es escòles dera Val d’Aran receberàn formacion contra eth sètge escolar
Comentarios