23.07.2018 |
Viure als Pirineus

ARAN

Era Val d’Aran barre 2017 damb un aument de 4,29% d'aucupacion otelèra respècte en 2016

Era conselhèra de Torisme d’Aran, Anna Díaz, a hèt publics aué es donades d'aucupacion otelèra ena Val d'Aran pendent er an 2017. Díaz qualifiquèc de boni es resultats der an 2017 entath sector otelèr dera Val d’Aran, damb un aument dera aucupacion mieja otelèra de 4,29% en an 2017, chifres que s'apròpen as d'abans dera crisi.

Paisatge aranès.
Paisatge aranès.
Era Val d’Aran barre 2017 damb un aument de 4,29% d'aucupacion otelèra respècte en 2016

Er an 2017 era Val d’Aran a obtengut ua aucupacion otelèra mieja annau de 46,94%. Des der an 2006 non s'auie comptabilizat un resultat tan naut d'aucupacion.

Es mesi damb ua aucupacion mès nauta son agost, hereuèr, deseme e juriòl, que depassen eth 50%. Cau auer en compde qu'entre es mesi de gèr e març, en qu'era aucupacion artenh 48%, eth nombre de places otelères dubèrtes ei superior as aufrides pendent es mesi d'estiu.

Es donades d'aucupacion son es quaus proporcionen es establiments toristics dubèrti (otèls e campings) dera Val d’Aran cada setmana pendent tot er an e que fin finau son contrastadi damb es obtengudi per INE (Institut Nacionau d'Estadistica) que harà publiques es sues donades a finaus deth mes de gèr. En aguesti resultats de 2017 encara non s'includissen es donades d'aucupacion d'apartaments d'us toristic, pr’amor que non s'a comptabilizat encara eth sòn emplec pendent tot er an, entà poder hè'c s'aurà de demorar a 2018, expliquèc era conselhèra Anna Díaz.

Es resultats se segmenten per zònes segontes es terçons dera Val d’Aran, Naut Aran, Miei Aran e Baish Aran, en que se constate era diferéncia d'aucupacion otelèra sasoèra en tot depéner des mesi der an.

Naut Aran a ua aucupacion mieja de 38%. Des der an 2008 non s'auie arribat a ua aucupacion superiora, que pendent er an 2017 a estat un punt superior a 2016. Eth mes de hereuèr ei eth mès potent en aguest terçon.

En Miei Aran era aucupacion a estat de 48,88%, mès d'un punt superior qu'en 2016. Des der an 2006 pas auie ua aucupacion otelèra superiora. Mijaran, damb eth cap-lòc Vielha, ei eth terçon mès regular e estable, en tot èster agost eth mes mès potent damb ua aucupacion de 73,93%.

Baish Aran a obtengut ua aucupacion mieja de 31,40%, 8 punts mès qu'er an 2016 (23,03%). Des der an 2011 non auie un resultat superior. Eth mes d'agost tanben ei eth melhor damb ua aucupacion qu'artenh 74,82%.

Era conselhèra Anna Díaz a arrebrembat qu'es donades d'aucupacion otelèra de Setmana Santa der an 2017 sigueren fòrça bones, pr’amor qu'en mes d'abriu era Val d'Aran aufrís era possibilitat de practicar activitats en contacte damb era natura, ath delà de prepauses culturaus e ludiques enes musèus e pòbles dera Val, ath costat des activitats religades damb er esquí. D'autra banda, eth darrèr mes de 2017 comencèc pro ben en çò que tanh as resultats d'aucupacion toristica en Val d’Aran pendent deseme, qu'arribèc es dies principaus deth pònt a 82,26% (de dimèrcles a dimenge), e se comptabilizam tota era setmana entre eth 4 e eth 10 de deseme damb ua aucupacion qu'arribèc ath 66,18%, damb era grana afluéncia de 70.000 esquiaires en Baqueira Beret, que beneficièc a tot eth sector toristic dera Val d’Aran, non solaments as establiments otelèrs o apartaments d'emplec toristic, mès tanben en sector dera restauracion, comerciau e de servicis.

En çò que tanh ara totalitat des donades religades damb eth sector toristic ena Val d’Aran, era conselhèra Anna Díaz, expliquèc que coma cada an, serà en mes de març quan des de Torisme Val d'Aran se haràn publics es resultats damb era publicacion dera memòria annau.

Comentarios