INSTITUCIONS

Era sindica d’Aran s’amasse damb eth grop parlamentari deth PSC

Aguesta ei era prumèra des amassades qu’era sindica d’Aran mantierà damb es grops parlamentaris entà expausar-les es besonhs e rèptes de futur deth nòste territòri
Síndica Aran reunió amb PSC
photo_camera Maria Vergés s’amassèc damb eth president deth grop parlamentari deth PSC /CGA

Era sindica d’Aran, Maria Vergés, s’amassèc ager en Parlament de Catalunya damb eth president deth grop parlamentari PSC Units per Avançar, Salvador Illa, e es deputats per Lleida d’aguest grop, Òscar Ordeig, Sílvia Romero e Judith Alcalà, as qui arregraïc era atencion e comprension balhada.

“Pendent aguesta amassada, les è transmetut eth besonh de qu’eth Conselh Generau d’Aran sigue partícep des iniciatives legislatives que se tramiten en Parlament e qu’afècten ara Val d’Aran de forma dirècta”, explicaue era sindica d’Aran, en tot híger que: “tanben les è explicat eth besonh, urgent, de que se desplegue definitivament er encastre competenciau que mandate era Lei d’Aran, autant en recorsi coma en collaboracion institucionau”.

Era d’ager siguec era prumèra d’un seguit d’amassades qu’era sindica d’Aran mantierà damb es grops parlamentaris entà expausar-les es besonhs e rèptes qu’encare Aran en diuèrsi airaus, e demanar eth sòn supòrt e compromís damb eth nòste terriòri e eth nòste autogovèrn.

Ath delà, deth Conselh Generau d’Aran ençà s’ei tanben ara demora dera formacion deth govèrn dera Generalitat de Catalunya entà demanar amassar-se damb eth nau executiu entà tractar sus diuèrsi ahèrs primordiaus entà Aran.