Eth passat 22 de hereuèr, era Sindica d’Aran, Maria Vergés, demanèc ath departament de Salut dera Generalitat informacion sus era prevision des mesures a aplicar en Aran deuant der aument de contagis, e sollicitèc d’accelerar eth procès de vacunacion. Tot e que, peth moment, eth Conselh Generau d’Aran non a recebut respòsta ad aguestes demanes, eth diuendres 26 eth govèrn dera Generalitat de Catalunya anonciaue en ròda de premsa que non preveiguie mesures especifiques entà Aran. Dauant d’aguesta informacion, era sindica d’Aran s’a adreçat nauament ara Generalitat, concrètament as conselhèrs de Salut, Interior, Educacion e Presidéncia e ath president en foncions, entà reclamar qu’establisquen mesures urgentes entà arturar era nauta incidéncia de COVID-19 ena Val d’Aran.
“Eth contròl dera mobilitat laguens de çò qu’establís eth PROCICAT ath torn deth barrament comarcau, er establiment de mesures enes escòles araneses que patissen un gran impacte aguestes setmanes e tanben era agilizacion e melhora des tràmits entà qu’eth professorat aranés pogue vacunar-se, e er aument de dòsis de vacunes tà immunizar ara poblacion, son accions que non depenen deth Conselh Generau d’Aran e que consideram qu’ara son essenciaus entà arturar aguesta incidéncia” declaraue era sindica d’Aran, que higie que “ath delà, reclamam que se mos informe sus es mesures de relaxacion e se s’aplicaran dera madeisha forma en Aran, pr’amor qu’aquerò condicionarà de forma dirècta ath nòste sistèma sanitari, actuaument fòrça tensionat”. En aguest sens era sindica a reclamat “ua respòsta urgenta ad aguestes demanes pr’amor qu’ei en jòc era sostenibilitat deth sistèma sanitari aranés e era salut e benèster dera nòsta ciutadania”.
Cau rebrembar que deth mes de gèr ençà eth govèrn deth Conselh Generau d’Aran a implementat tota ua sèrie d’accions, limitades pes sues competéncies e recorsi, entà lutar contra aguesta situacion.
(Foto: Entrada de l'Espitau Val d'Aran /Marta Lluvich)
As mesures ja establides a nivèu sanitari en Espitau Val d’Aran damb eth plan de contingéncia dejà elaborat en inici dera pandemia, e qu’actuaument a suspenut es intervencions quirorgiques programades, i cau híger era campanha d’informacion e conscienciacion amiada a tèrme per agents civics e Pompièrs d’Aran, e que se difon tanben trauès des hilats sociaus e des ajuntaments aranesi; era desinfeccion d’espacis publics o eth trabalh des inspectors de salut publica deth Servici Aranés de Benèster e Salut (SABS) enes escòles e instituts deth territòri, uns centres educatius damb qui eth govèrn deth Conselh ei en contacte periòdic entà balhar-les eth supòrt qu’agen de besonh.
