19.06.2021 |
Viure als Pirineus

INSTITUCIONS

Era sindica d’Aran reclame ara Generalitat era melhora deth finançament dera sanitat aranesa

Pendent era darrèra amassada dera Comission Mixta de seguiment en matèria de salut entre eth Conselh Generau d’Aran e era Generalitat
Amassada Salut
Amassada dera Comission Mixta de seguiment en matèria de salut/CGA
Era sindica d’Aran reclame ara Generalitat era melhora deth finançament dera sanitat aranesa

Eth passat dijaus, 26 de noveme, s’amassec era Comission Mixta de seguiment de tranferéncia de competéncies dera Generalitat de Catalunya ath Conselh Generau d’Aran en matèria de sanitat, ua amassada presidida pera sindica d’Aran, Maria Vergés, e era conselhèra de Salut dera Generalitat, Alba Vergés.

En aguesta amassada, era sindica d’Aran tornèc a reclamar, un còp mès, era melhora deth finançament dera sanitat aranesa. “Eth sistèma sanitari aranés acumule grèus problèmes financèrs originadi ena retalhada de recorsi qu’era Generalitat apliquèc ath Conselh Generau en tot redusir eth pressupòst dera maxima institucion aranesa en un 20%”, afirmaue era sindica d’Aran, en tot híger que: “era pandemia provocada pera COVID-19 a metut de manifèst qu’era Val d’Aran a patit mès encara pera manca de recorsi, tant professionaus coma economics, e aguesta ei ua situacion insostenibla”.

En an 2012, era Generalitat de Catalunya redusic de forma drastica era transferencia de recorsi ath Conselh Generau d’Aran entara gestion dera sanitat aranesa. Se passèc de 13.177.000 euròs en 2011 a 10.479.000 en an següent. Eth pressupòst destinat ara sanitat aranesa se vedec redusit en un 10’23%, en tot qu’era retalhada que patic eth sistèma sanitari catalan siguec deth 5%.

En aguest sens, era sindica d’Aran declarèc que: “d’alavetz ençà, era sanitat aranesa patís un important infrafinançament e non s’a tornat a recuperar era chifra iniciau, a despièch qu’era cartera de servicis assistenciaus a aumentat e a hijut que “eth Conselh Generau d’Aran a auut de destinar un milion e miei d’euros ar an entà curbir aguest deficit”.

Era sindica arregraic era predisposicion dera Region Sanitària der Alt Pirineu i Aran enquiath moment e insistic en besonh de mantier ua relacion bilaterau, de govèrn a govèrn, entà tractar es ahèrs que tanhen, non sonque ara sanitat senon a toti es traspassi gestionadi peth Conselh Generau d’Aran.

Era sindica d’Aran reclame ara Generalitat era melhora deth finançament dera sanitat aranesa
Comentarios